2020 ވަނަ އަހަރަށްވުރެ ރާއްޖޭގެ މާލީ ޙާލަތާއި ދަރަނީގެ ޙާލަތު މިހާރު ގޯސް ކަމަށް އޭޝިއަން ޑިވެލޮޕްމެންޓު ބެންކް (އޭޑީބީ) އިން ބުނެފިއެވެ.

އޭޑީބީ އިން މިހެން ބުނެފައިވަނީ ދިވެހިރާއްޖޭގެ ތަރައްގީއަށް މާލީ އެހީ ދެމުންދާ އޭޑީބީއިން މި އަހަރުގެ ޖުލައި މަހުގެ ނިޔަލަށް ރާއްޖޭގެ މާލީ ހާލަތު ދިރާސާ ކުރުމަށް ފަހު ނެރުނު ރިޕޯޓުގައެވެ.

އެރިޕޯޓުގައި ދިވެހިރާއްޖޭގެ މާލީ ޙާލަތު އަދި ދަރަނީގެ މައްސަލަތައްވެސް 2020 ވަނަ އަހަރަށް ވުރެ ގޯސްކަން ވަނީ ފާހަގަ ކޮށްފައެވެ.

އެ ބެންކުން ބުނެފައިވާގޮތުން، 2020 ވަނަ އަހަރުގެ ތެރޭގައިވެސް ރާއްޖޭގެ ދަރަނި ހުރީ އިންތިހާއަށް މަތީގައިކަމަށެވެ. އެގޮތުން 2020 ވަނަ އަހަރުގެ ތެރޭގައި ކޮވިޑްގެ ދަތިތަކުގެ ތެރެއިން އަރައިގަތުމަށް ކުރި ހަރަދުތަކާއި އިޤްތިސާދު ހީނަރުވުމުގެ އިތުރުން ދުނިޔޭގެ ތެލުގެ ބާޒާރުގެ އަގުތައް އަރައިގެންދިޔަ ވަގުތު ސަބްސިޑީގެ ގޮތުގައި ކުރި ހަރަދުތަކުގެ ސަބަބުންވެސް ދަރަނީގެ މައްސަލަތައްވަނީ އޭރުވެސް އިންތިހާއަށް ގޯސްވެފައިކަން ވަނީ ފާހަގަ ކޮށްފައެވެ.

އޭޑީބީއިން ބުނެފައިވާގޮތުން، އެ ބެންކުންދަނީ އެހީދީގެން ރާއްޖޭގެ ދަރަނީގެ މައްސަލަ ހައްލުކުރުމަށާއި ޓެކްސްގެ ނިޒާމު އިތުރަށް ހަރުދަނާކުރުމުގެ އިތުރުން އެ ސިޔާސަތުތައްވެސް ވަރުގަދަކުރުމަށް މަސައްކަތްތަކެއް ކުރަމުންނެވެ.

އެގޮތުން 2023 ވަނަ އަހަރުގެ އެޕްރިލް މަހުގެ ތެރޭގައި 1.5 މިލިއަން ޑޮލަރު ހަރަދުކޮށްގެން ރާއްޖެއާއި އެހެނިހެން ތަރައްގީވަމުން އަންނަ ޤައުމުތަކުގެ ގާބިލުކަން އިތުރު ކުރުމަށް މަސައްކަތްތަކެއް ކޮށްފައިކަމަށް ބުނެފައިވެއެވެ.

އެހެންނަމަވެސް ރާއްޖޭގައި އެ މަސައްކަތްތައް ކުރުމުގައި ގޮންޖެހުންތަކެއް ހުރިކަމަށް ބުނެފައިވެއެވެ.

އެބޭންކުން ބުނެފައިވަނީ ރާއްޖޭގެ މުއައްސަސާތަކުން އެބޭންކުން ކުރަމުންދާ މަސައްކަތަށް އެއްބާރުލުން ނުދޭ ކަމަށެވެ.