ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މިސަރުކާރު ނިމުމަކާއި ގާތަށް އައިސްފައިވާ ކަމަށް ކެންދޫ ދާއިރާގެ މެންބަރު ޢަލީ ހުސައިން ވިދާޅުވެއްޖެއެވެ. 

ޢަލީ މިފަދައިން ވިދާޅުވީ، ސަރުކާރުގެ އިކޮނޮމިކް މިނިސްޓްރީގެ ސީނިއަރ އެގްޒެކެޓިވް ޑައިރެކްޓަރުގެ މަގާމްގައި ހުރި އެމްޑީޕީގެ މީސް މީޑިއާ އެކްޓިވިސްޓު އަހުމަދު އަންވަރު (ސިމްވާރު) ސަރުކާރުން އިސްތިއުފާދީ، އެމްޑީޕީގެ ކުރީގެ ރައީސް ނަޝީދު އުފައްދަވާފައިވާ ޑިމޮކްރެޓްސް ޕާޓީއާއި ގުޅުމާއި ގުޅިގެން އޭނާއަށް މަރުހަބާ ދަންނަވައި ކުރެއްވި ޓްވީޓެއްގައެވެ. 

އެގޮތުން އަލީ ވިދާޅުވީ، ސިމްވާރުގެ އެ ނިން ނިންމުމަކީ ރަނގަޅު ނިންމުމެއް ކަމަށެވެ. އަދި މި ސަރުކާރު ނިމުމަކަށް އައުމާގާތަށް އައިސްފައިވާ ކަން ސިފަކުރައްވައި އަލީ ވިދާޅުވީ، އިރު ހުރީ އަސުރަށް ތިރިވެފައި ކަމަށާ ދާދި އަވަހަށް އޮއްސިދާނެ ކަމަށެވެ. އަދި މި ވަގުތު ބޭނުން ވަނީ ކުޑަ ހިތްވަރެއް ކަމަށްވެސް އޭނާ ވިދާޅުވި އެވެ. 

Advertisement

ސިމްވާރު އެމްޑީޕީން ވަކިވެ ނަޝީދުގެ ޑިމޮކްރެޓްސް އަށް ސޮއި ކޮށްފައިވާއިރު ، އެމްޑީޕީގެ ޕްރައިމަރީގައި އޭނާ ތާއީދު ކޮށްފައިވަނީ ރައީސް ޞާލިހަށް ކަން ފާހަގަކޮށްލަން ޖެހެއެވެ. އަދި އިސްތިއުފާ ދިނުމުގެ ކުރިން އޭނާ އަކީ ރައީސް ޞާލިހަށް ތާއީދުކޮށް މީސް މީޑިއާގައި ވަރަށް ހަރަކާތްތެރިކޮށް އުޅުނު މީހެއްކަންވެސް ފާހަގަކޮށްލަން ޖެހެއެވެ. 

އެމްޑީޕީން އިސްތިއުފާ ދިނުމަށްފަހު އޭނާ މިހާރު ހަރަކާތްތެރިވަމުންދަނީ ޑިމޮކްރެޓްސް ގެ ސިޔާސަތު 'ފަސޭހަ ވިޔަފާރި' ލޯންޗް ކުރަމުގެ މަސައްކަތުގައި އަތޮޅު ތެރޭގައެވެ. 

ސިމްވާރު ގެ އިތުރުންވެސް އެމްޑީޕީގެ މެންބަރުންގެ ތެރެއިން ސަރުކާރުގެ މަގާމުތަކުގައި ތިބި ގިނަ މެންބަރުންތަކެއް އިސްތިއުފާދީ ޑިމޮކްރެޓްސް އާއި ވަނީ ގުޅިފައެވެ.