ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމު މިވަގުތު ޖަލު ހުކުމެއް ތަންފީޒުކުރައްވަން ޖެހިވަޑައިގަތުމަކީ ޕީޕީއެމްއަށް ގޮތް ހުސްވުންކަމަށް ރައްޔިތުންނަށް ވިސްނައިދޭން މަސައްކަތް ނުކުރުމަށް އިދިކޮޅުން ގޮވާލައިފި އެވެ. 

ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމު މިވަގުތު ގެންދަވަނީ އެމަނިކުފާނުގެ މައްޗަށް މިދިޔަ ޑިސެމްބަރު މަހުގެ 25 ގައި ކްރިމިނަލް ކޯޓުން ކުރި 11 އަހަރުގެ ޖަލު ހުކުމް ތަންފީޒު ކުރައްވަމުންނެވެ. 

އެ ހުކުމަކީ ފަނޑިޔާރުންނަށް ނުފޫޒު ފޯރުވައިގެން، ރިޝަވަތުދީގެން ކޮށްފައިވާ "ސިޔާސީ ހުކުމެއް" ކަމަށް އިދިކޮޅު ލީޑަރުން ވިދާޅުވަމުންދާއިރު، ރައީސް ޔާމިނުގެ ފަރާތްޕުޅުން ވަނީ އެ ހުކުމް ހައިކޯޓުގައި އިސްތިއުނާފު ކޮށްފަ އެވެ. އަދި މިހާރު އެ މައްސަލަ އޮތީ ގާތްގަނޑަކަށް ނިމުމަކާއި ހަމަޔަށް ގޮސްފައެވެ. 

ހައިކޯޓުގައި އެ މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވާ 2 ފަނޑިޔާރެއް ޗުއްޓީއަށް ވަޑައިގަތުމާއި ގުޅިގެން އެ މައްސަލަ އޮތީ މަޑުޖެހިފައެވެ. އެކަމާއި ގުޅިގެން އިދިކޮޅުން ދަނީ ކަންބޮޑުވުން ވެސް ފާޅުކުރަމުންނެވެ. 

އެހެން ނަމަވެސް އިދިކޮޅުން ބުނަމުންދަނީ ރައީސް ޔާމިނުގެ ނަންފުޅު ރިޔާސީ އިންތިޚާބުގެ ކަރުދާސްކޮޅުގައި އޮންނާނެ ކަމަށެވެ. 

އެކަމާއި ގުޅޭގޮތުން ޕީޕީއެމް އޮފީހުގައި އަންގާރަ ދުވަހުގެ ރޭ ބޭއްވި ޖަލްސާއެއްގައި ވާހަކަދައްކަވަމުން ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވީ ޕީޕީއެމަށް ގޮތް ހުސްވެފައިވާކަމަށް ރައްޔިތުންނަށް ސަރުކާރުން ކުރާ މަސައްކަތް ހުއްޓާލުމަށް ގޮވާލައްވާކަމަ ށެވެ. 

ޕީއެންސީގެ ނައިބު ރައީސް ޝުޖާއު/ ފޮޓޯ: ދެން

ޝުޖާއު ވިދާޅުވީ ޕީޕީއެމް އޮތީ ރައީސް ޔާމިންގެ ފަހަތްޕުޅުގައި ވަރަށް ބަދަހިކޮށް ކަމަށެވެ. އަދި ޕީޕީއެމަކީ އިންތިޒާމުވެގެން ސިޔާސީ ހަރަކާތްތައް ހިންގާ ޕާޓީއެއް ކަމަށާއި، ރިޔާސީ އިންތިޚާބުގައި ކަންކަން ކުރަންވީ ގޮތް ވެސް ޕާޓީން އޮތީ ރާވައި ނިންމާފައިކަމަށް އޭނާ ވިދާޅުވި އެވެ.