ކުރިއަށް އޮތް ރިޔާސީ އިންތިޚާބުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހާއި ވާދަކުރުމަށް ޕާޓީތަކުން ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމާއި ރުހޭނަމަ އެބޭފުޅުން އެދިލައްވާގޮތަށް ކޮމަން ކެންޑިޑޭޓެއް ނެރެން ތައްޔާރުކަމަށް ޕީޕީއެމުން ބުނެފި އެވެ. 

ޖުމްހޫރީ ޕާޓީއާއި، ދަ ޑިމޮކްރެޓްސްއާއި އެމްއެންޕީިން މިއަދު ކުރިއަށް ގެންދިޔަ މަޝްވަރާ ބައްދަލުވަށްފަހު މީޑިއާއަށް މައުލޫމާތު ދެމުން ބުނީ ޕީޕީއެމުން އެއްބަސް ވާނަމަ ރިޔާސީ އިންތިޚާބުގައި ގިނަ ސިޔާސީ ޕާޓީތައް ގުޅިގެން އެއް ކެންޑިޑޭޓަކު ނެރެން އެ ތިން ލީޑަރުން ތައްޔާރަށް ތިބިކަމަށެވެ. 

ކޮމަން ކެންޑިޑޭޓަކު ނެރުމާއި ގުޅޭގޮތުން ތިން ލީޑަރުން ދެއްކި ވާހަކަތަކާއި ގުޅިގެން ޖަވާބުދިނުމަށް ޕީޕީއެމުން ވަނީ ބަޔާނެއް ނެރެފައ އެވެ. 

އެގޮތުން ޕީޕީއެމުން ނެރުނު ބަޔާނުގައި ބުނެފައި ވަނީ ރައީސް އިބްރާހީމް މުޙައްމަދު ޞާލިޙުގެ ވެރިކަން ނިންމުމުގައި ރައީސް ޢަބްދުﷲ ޔާމީން ޢަބްދުލްޤައްޔޫމަކީ ޕާޓީތަކުން އެއްބަސްވެވަޑައިންނަވާ ކެންޑިޑޭޓް ކަމުގައި ހަމަޖެއްސެވުމަށް އެ ޕާޓީން އެދޭ ކަމަށެވެ.

އަދި އިބްރާހީމް މުޙައްމަދު ޞާލިޙުގެ ވެރިކަން ނިންމުމުގައި ޕާޓީތަކުން ގުޅިގެން ކުރައްވަމުން ގެންދަވާ މަސައްކަތަށް އެ ކޯލިޝަނުން މަރުޙަބާ ކިޔައި ޝުކުރު ދަންނަވާ ކަމަށެވެ.

ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓަކީ ރައީސް ޢަބްދުﷲ ޔާމީން ޢަބްދުލްޤައްޔޫމް ކަމުގައި ނިންމާފައިވަނީ 2022 ޖުލައި 31 ވަނަ ދުވަހު ޕީޕީއެމް އަދި ޕީއެންސީގެ ސެނެޓްގެ އިއްތިފާޤުންކަމަށާއި، އެމަނިކުފާނަށް އެފަހުން ރިޔާސީ ޓިކެޓު ރަސްމީކޮށް ހަވާލުކޮށްފައިވާ ކަމަށް އެ ކޯލިޝަނުން ވަނީ ބުނެފަ އެވެ.

އިދިކޮޅުން އިތުރަށް ބުނީ މިއަހަރުގެ ރިޔާސީ އިންތިޚާބު ކާމިޔާބު ކޮށްދިނުމަށްޓަކައި ކުރަން ޖެހޭ މަސައްކަތްތައް މިކޯލިޝަންގެ ފަރާތުން މާލެއާއި އަތޮޅުތަކުގައި ބާރަށް ކުރިއަށް ގެންދާ ކަމަށެވެ. 

މީގެ ކުރިންވެސް އިދިކޮޅުން ބުނީ އެ ޕާޓީން ތާއީދު ކުރާނެ ކެންޑިޑޭޓަކީ ރައީސް ޔާމީން ކަމަށެވެ. އަދި އެހެން ޕާޓީތަކުން ޕީޕީއެމް ފަހަތަށް އަރައި މަސައްކަތް ކުރުމަށް ވެސް އެ ޕާޓީން ވަނީ ގޮވާލައްވާފަ އެވެ.