އަންހެނުންގެ ވޯލްޑްކަޕް ފުޓުބޯޅަ މުބާރާތުގައި ގުރޫޕް އޭގައި މިއަދު ކުޅެވުނު މެޗުގައި ނޯވޭގެ މައްޗަށް ނިއުޒިލޭންޑުން ތާރީޚީ މޮޅެއް ހޯދައިފި އެވެ.

ދެޓީމުގެ ފަރާތުން ވާދަކުރި ކުޅުމެއް ފެނިގެންދިޔަ މިމެޗު ނިއުޒިލޭންޑުން ކާމިޔާބުކުރީ 1-0 ގެ ނަތީޖާއަކުންނެވެ. މެޗުގެ ފުރަތަަމަ ހާފުގައި ދެޓީމުން ވެސް ލަނޑު ޖަހާނެ ރަގަޅު ފުރުސަތުތަކެއް ތަނަވަސްކުރި ނަމަވެސް ފުރަތަަމަ ހާފުގެ ކުޅުން ނިމިގެންދިޔައީ 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފު ފެށިގެން ތިންވަނަ މިނެޓުގައި ނިއުޒިލޭންޑުން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މި ލަނޑު އެޓީމަށް ކާމިޔާބުކޮށްދިނީ  ތަޖުރިބާކާރު ފޯވާޑް ހަނާ ވިލްކިންސަން އެވެ. މިއީ އެޓީމުގެ ފޯވާޑް ލާއްކަ ހޭންޑް ހުރަސްކޮށްދިން ބޯޅައެއް ނޯވޭގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ނިއުޒިލޭންޑުގެ ލަނޑަށްފަހު ދެ ޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. އަދި ފަހުހާފުގެ 90 ވަނަ މިނެޓުގައި ލީޑު ފުޅާކުރުމަށް ނިއުޒިލޭންޑަށް ވަނީ ޕެނަޓީއެއް ވެސް ލިބިފައެވެ. ނަމަވެސް އެޓީމުގެ ތަޖުރިބާކާރު ޑިފެންޑަރު ރިއާ ޕަރސިވަލް ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ. މިއާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ނިއުޒިލޭންޑް ކުރީގައި އޮވެގެންނެވެ. އަދި މި މެޗަކީ އަންހެނުންގެ ފުޓްބޯޅައިގައި ނޯވޭގެ މައްޗަށް ނިއުޒިލޭންޑުން ކުރި ހޯދި ފުރަތަމަ މެޗެވެ.

މި މެޗުން ލިބުނު ތިން ޕޮއިންޓާއެކު ގުރޫޕް އޭގެ އެއްވަނައިގައި ނިއުޒިލޭންޑް މިވަގުތު އޮތްއިރު، މި ގުރޫޕްގައި ދެން ހިމެނެނީ ނޯވޭ އާއި ސްވިޒަލޭންޑްގެ އިތުރުން ފިލިޕީންސް އެވެ.