މިއަދު ފެށި އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް ބީގައި އޮސްޓްރޭލިއާ އާއި އަޔަލެންޑް ވާދަކުރި މެޗު ވާދަވެރި ކުޅުމަކަށްފަހު 1-0 ގެ ނަތީޖާއަކުން އޮސްޓަރުލިޔާ އިން ކާމިޔާބުކޮށްފި އެވެ.

މެޗުގެ ފުރަތަަމަ ހާފުގައި ދެޓީމުން ވެސް ލަނޑު ޖަހާނެ ރަގަޅު ފުރުސަތުތަކެއް ތަނަވަސްކުރި ނަމަވެސް ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފު ފެށިގެން 7 ވަނަ މިނެޓުގައި އޮސްޓްރޭލިއާ އިން ވަނީ ލަނޑެއް ކާމިޔާބުކޮށް މެޗުގެ ލީޑުނަގާފައެވެ.

މިލަނޑު އެޓީމަށް ލިބުނު ޕެނަޓީއަކުން ކާމިޔާބުކޮށްދިނީ ޑިފެންޑަރު ސްޓެފަނީ ކެޓްލީ އެވެ. މި ލަނޑަށްފަހު ވެސް ދެޓީމުން ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން އޮސްޓްރޭލިއާ ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ގްރޫޕް ބީގެ އެއްވަނައިގައި އޮސްޓްރޭލިއާ އޮތްއިރު، މި ގުރޫޕްގައި ދެން ހިމެނެނީ އަޔަލެންޑް އާއި ކެނެޑާގެ އިތުރުން ނައިޖީރިއާ އެވެ.

މިއަހަރުގެ އަންހެނުންގެ ވޯލްޑްކަޕް ފުޓްބޯޅަ މުބާރާތް އޮސްޓްރޭލިއާ އަދި ނިއުޒީލެންޑްގައި ކުރިއަށްދާ އިރު މިއީ 32 ޓީމު ބައިވެރިކޮށްގެން މި މުބާރާތް ބާއްވާ ފުރަތަަމަ ފަހަރެވެ. އެންމެ ފަހުން 2019 ވަނަ އަހަރު ފުރާންސްގައި ބޭއްވުނު އަންހެނުންގެ ވޯލްޑްކަޕް ގައި ވާދަކޮށްފައި ވަނީ 24 ޓީމެވެ.