އޮސްޓްރޭލިޔާ އާއި ނިއުޒިލޭންޑްގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް ބީގައި މިއަދު ހެނދުނު ކުޅެވުނު ނައިޖީރިއާ އާއި ކެނެޑާގެ މެޗު އެއްވަރުވެގެން ނިމިއްޖެ އެވެ.

މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ ނަމަވެސް މި ހާފުގައި އެޓީމުން ކުރެ އެއްވެސް ޓީމަކަށް ލަނޑުޖަހާނެ މާރަގަޅު ހުސް ފުރުސަތުތަކެއް ތަނަވަސްކުރެވިފައެއް ނުވެއެވެ. ނަތީޖާއެއްގެ ގޮތުން ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ކެނަޑާއިން އެޓީމުގެ ކުޅުން ރަނގަޅުކޮށް ރަގަޅު ހަމަލާތަކެއް އުފެއްދޭތޯ މަސައްކަތް ކުރި އެވެ. ނަތީޖާއެއްގެ ގޮތުން މިހާފުގައި އެޓީމަށް ވަނީ ޕެނަލްޓީއެއް ވެސް ލިބިފައެވެ. ނަމަވެސް އެޓީމުގެ ހުރި އެންމެ ތަޖުރިބާކާރު ކުޅުންތެރިޔާ ކްރިސްޓީން ސިންކްލެއާ ފޮނުވާލި ޕެނަލްޓީ ނައިޖީރިއާގެ ގޯލްކީޕަރު ޗިއަމަކާ ނަނަޑޯޒީ ވަނީ ހުޝިޔާރުކަމާއެކު ދިފާއުކޮށްފައެވެ.

އުމުރުން 40 އަހަރުގެ ކްރިސްޓީން ސިންކްލެއާ ފޮނުވާލި ޕެނަލްޓީ ކާމިޔާބު ކުރެވުނު ނަމަ އޭނާ ވެގެންދާނީ ހަ ވޯލްޑްކަޕްގައި ލަނޑުޖެހި ފުރަތަަމަ ކުލުންތެރިޔާ އަށެވެ.

ދެވަނަ ހާފުގައި ކެނަޑާގެ ފަރާތުން ރަގަޅު ހަމަލާތަކެއް ފެނިގެންދިޔަ މިހާފުގައި އެޓީމުގެ ހަމަލާތައް ހުއްޓުމުގައި ނައިޖީރިއާގެ ފަރާތުން ވަނީ ރަގަޅު ޑިފެންސިވް ކުޅުމެއް ފެނިގެން ގޮސްފައެވެ. އަދި މެޗުގެ އިތުރު ވަގުތުގެ ތެރޭގައި ނައިޖީރިއާގެ  މިޑްފީލްޑަރު ޑެބޯރާ އަބިއޯދުން ކުރި ކުށަކާއި ގުޅިގެން ރެފްރީ ވަނީ އޭނާއަށް ސީދާ ރަތް ކާޑެއް ދައްކާ ދަނޑުން ފޮނުވާލައިފައެވެ.

މިއާއެކު މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މި ގުރޫޕްގައި މިވަގުތު އެއްވަނައިގައި އޮތީ ފުރަތަަމަ މެޗުގައި އަޔަލެންޑް އަތުން މޮޅުވި އޮސްޓްރޭލިޔާ އެވެ. އަދި ކެނަޑާ އާއި ނައިޖީރިއާ އަށް ކޮންމެ ޓީމަކަށް އެއް ޕޮއިންޓް ލިބިފައިވާއިރު މި ގުރޫޕްގެ ފުލުގައި އޮތީ އަޔަލެންޑެވެ.