މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް އޭގައި މިއަދު ހެނދުނު ކުޅުނު ދެވަނަ މެޗުގައި 2-0 ގެ ނަތީޖާއަކުން ފިލިޕީންސް ބަލިކޮށް ސްވިޒަލެންޑުން މުބާރާތުގެ ފެށުން ރަނގަޅުކޮށްފި އެވެ.

މި މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން ސްވިޒަލޭންޑް އިން މެޗު ޑޮމިނޭޓުކުރިއިރު، މިހާފުގައި ދެޓީމުން ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. އަދި ފުރަތަަމަ ހާފުގެ އެންމެ ފަހު މިނެޓްގައި ލިބުނު ޕެނަލްޓީއަކުން އެޓީމަށް މެޗުގެ ލީޑު ހޯދައިދިނީ ތަޖުރިބާކާރު ފޯވާޑް ރަމޯނާ ބަޗްމަން އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ސްވިޒަލޭންޑް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް މެޗު ޑޮމިނޭޓުކުރީ ސްވިޒަލޭންޑް އިންނެވެ. ނަމަވެސް ފުރަތަމަ ފަހަރަށް ވޯލްޑް ކަޕްގައި ކުޅުނު ފިލިޕީންސް އިން ވަނީ މި މެޗުގައި ރަގަޅު ޑިފެންސިވް ކުޅުމެއް ދައްކައިދީފައެވެ. މި މެޗުގައި ސްވިޒަލޭންޑް އިން ކާމިޔާބުކުރި ދެވަނަ ލަނޑު ފަހުހާފުގެ 64 ވަނަ މިނެޓުގައި ކާމިޔާބުކޮށްދިނީ ޑިފެންޑަރު ސެރައިނާ ޕިއުބެލް އެވެ. މިއީ ފިލިޕީންސްގެ ޕެނަލްޓީ އޭރިއާ ތެެރެއިން އެޓީމުގެ ޑިފެންޑަރުންނަށް ހެދުނު ގޯހެއްގެ ފައިދާ ނަގައި މުޅިން ހުސްކޮށް ހުރެ ގޯލުގެ ތެރެއަށް ބޯޅަ ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މި ލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން ސްވިޒަލޭންޑް ކުރީގައި އޮވެގެންނެވެ. 

މި މެޗުން ލިބުނު ތިން ޕޮއިންޓާއެކު ލަނޑުގެ ތަފާތުން ގްރޫޕް އޭގެ އެއްވަނައިގައި މިވަގުތު އޮތީ ސްވިޒަލޭންޑް އެވެ. ދެވަނަގައި އޮތް ނިއުޒިލޭންޑަށް ވެސް ތިން ޕޮއިންޓް ލިބިފައިވާއިރު މި ގުރޫޕްގައި ހިމެނޭ ނޯވޭ އަދި ފިލިޕީންސް އަކަށް އަދި ޕޮއިންޓެއް ނުލިބެއެވެ.