ނިއުޒިލޭންޑާއި އޮސްޓަރުލިޔާގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގްރޫޕް ސީގައި މިއަދު މެންދުރު ކުޅެވުނު މެޗުގައި ފަސޭހަކަމާއި އެކު 3-0 ގެ ނަތީޖާއަކުން ކޮސްޓަރީކާ ބަލިކޮށް ސްޕެއިނުން އިތުބާރާއެކު މުބާރާތް ފަށައިފި އެވެ.

މެޗުގެ ފުރަތަަމަ ހާފުގައި ސްޕެއިންގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، މި މެޗުގައި އެޓީމުން ކާމިޔާބުކުރި ފުރަތަަމަ ލަނޑަކީ  ފުރަތަމަ ހާފުގެ 21 ވަނަ މިނެޓުގައި ކޮސްޓަރީކާގެ ޒުވާން ޑިފެންޑަރު ވެލެރިއާ ޑެލް ކެމްޕޯ އަތުން ބައިކޮޅަށް ވަން ލަނޑެކެވެ. އަދި އޭގެ ދެ މިނެޓު ފަހުން ސްޕެއިންގެ ލީޑު ފުޅާކޮށްދިނީ ބާސެލޯނާގެ މިޑްފީލްޑަރު އައިތާނާ ބޮންމަޓީ އެވެ.

މިއީ އެޓީމުގެ ބާސެލޯނާގެ ޑިފެންޑަރު އޮނާ ބަޓްލް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މި މެޗުގައި ސްޕެއިން އިން ކާމިޔާބުކުރި ތިންވަނަ ލަނޑު ފުރަތަމަ ހާފުގެ 27 ވަނަ މިނެޓުގައި ކާމިޔާބުކޮށްދިނީ ރެއާލް މެޑްރިޑްގެ ފޯވާޑް އެސްޓާ ގޮންޒާލޭޒް ރޮޑްރިގޭޒް އެވެ. އަދި އެޓީމުގެ ލީޑު އިތުރަށް ފުޅާކުރުމަށްޓަކައި ފުރަތަމަ ހާފުގެ 34 ވަނަ މިނެޓުގައި ސްޕެއިންއަށް ވަނީ ޕެނަޓީއެއް ވެސް ލިބިފައެވެ.

ނަމަވެސް އެޓީމުގެ ޖެނިފަރ ހަރުމޯސޯ ފޮނުވާލި ޕެނަލްޓީ ނާކާމިޔާބު ވިއިރު، ފުރަތަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން ސްޕެއިން ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ސްޕެއިންގެ ފަރާތުން ގިނަ ހަމަލާތަކެއް ފޮނުވާލާފައިވާ އިރު، މި ހާފުގައި ކޮސްޓަރީކާގެ ފަރާތުން ވަނީ ރަގަޅު ދިފާއި ކުޅުމެއް ފެނިގެން ގޮސްފައެވެ. މިއާއެކު މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 3-0 ގެ ނަތީޖާއަކުން ސްޕެއިން ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ގުރޫޕް ސީގެ އެއްވަނައިގައި ސްޕެއިން މިވަގުތު އޮތް އިރު މި ގުރޫޕްގައި ދެން ހިމެނެނީ ކޮސްޓަރީކާގެ އިތުރުން ޒެމްބިއާ އާއި ޖަޕާނެވެ.