މިއަހަރުގެ ސެޕްޓެމްބަރު 9ގައި ބޭއްއްވުމަށް ހަމަޖެހިފައިވާ ރިޔާސީ އިންތިޚާބަށް ކުރިމަތިލުމަށް އިލެކްޝަންސް ކޮމިޝަނުން ހުޅުވާލައިފިއެވެ.

މިއަދު އީސީ އިން ކޮށްފައިވާ އިޢުލާނެއްގައި ބުނެފައިވަނީ ރައީސުލްޖުމްހޫރިއްޔާގެ މަގާމަށް ކުރިމަތިލުމުގެ ފުރުސަތު މާދަމާ ހެނދުނު 9:00 އިން ފެށިގެން އޮގަސްޓު 7 ގެ 2:00 އާ ހަމައަށް ހުޅުވާލާފައިވާ ކަމަށެވެ.

އިންތިޚާބަށް ކުރިމަތިލުމަށް އެދޭ ފޯމާއި ތަކެތި ހުށަހަޅަން ޖެހޭނީ ދަރުބާރު ގޭގައި ހުންނަ އިންތިޚަބާއި ބެހޭ މަރުކަޒާއި އީސީއަށް ކަމަށް އެ އިޢުލާނުގައި ބުނެފައިވެ އެވެ.

އީސީގެ އިޢުލާނުގައި ބުނެފައިވަނީ ޤާނޫނުއަސާސީގެ 109 ވަނަ މާއްދާ އާއި ރިޔާސީ އިންތިޚާބުގެ ޤާނޫނުގެ 7 ވަނަ މާއްދާގައި ބަޔާން ކޮށްފައިވާ ގޮތުން ރައިސުލްޖުމްހޫރިއްޔާ ކަމުގެ މަގާމަށް ކުރިމަތިލާ މީހުންގެ ޝަރުތުތައް ވެސް ބަޔާން ކޮށްފަ އެވެ.

އެޝަރުތު ތަކުގެ ތެރޭގައި ހިމެނެނީ ދިވެހި މަންމައަކާއި ދިވެހި ބައްޕައަކަށް އުފަން ދިވެހި ރައްޔިތަކު ކަމުގައިވުން އަދި ބޭރު ގައުމެއްގެ ރައްޔިތަކު ކަމުގައި ނުވުމާއި، މުސްލިމަކު ކަމުގައިވުމާއި ސުންނަތް ޖަމާޢަތުގެ މީހަކު ކަމުގައިވުން، އުމުރުން 35 އަހަރުވެފައިވާ މީހަކު ކަމުގައިވުން، ބުއްދި ހަމައަށް ހުރި މީހަކު ކަމުގައިވުން، އަދާ ކުރަން ޖެހޭ ސާބިތު ދަރަންޏެއް އޮތް މީހަކު ނަމަ އެ ދަރަނި ހަލާސް ނުކޮށް ހުރި މީހަކު ކަމުގައި ނުވުން ހިމެނެއެވެ.

އަދި ޖިނާއީ ކުށެއް ކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް ކުރެވިފައިވާ މީހަކު ނަމަ އެ ހުކުމް ތަންފީޒުކޮށް ނިމުނުތާ ނުވަތަ ހުކުމުން ކަނޑައެޅުނު އަދަބު މައާފު ކުރެވުނުތާ ތިން އަހަރުވެފައިވާ މީހަކު ކަމުގައިވުން އަދި އެމީހަކީ އިސްލާމް ދީނުގައި ހައްދު ކަނޑައެޅިފައިވާ ކުށެއް ނުވަތަ މަކަރާ ހީލަތް، ޓެކުން، ހިޔާނާތުގެ ކުށެއް ކުރިކަން ޝަރީއަތަށް ސާބިތުވެފައިވާ މީހެއް ކަމުގައި ނުވުން ހިމެނެއެވެ.

އެ އިއުލާނުގައި ބުނެފައިވާ ގޮތުން ރައިސުލްޖުމްހޫރިއްޔާގެ މަޤާމަށް އަމިއްލަ ގޮތުން ކުރިމަތިލާ ފަރާތެއް ނަމަ 1500 މީހުންގެ ތާއީދު އޮތް ކަން ހާމަ ކުރާ ލިޔުމެއް ހުށަހަޅަން ޖެހެ އެވެ.

ސެޕްޓަމްބަރު 9ވަނަ ދުވަހު އިންތިޚާބު ބޭއްވުމަށް ހަމަޖެހިފައިވާއިރު،  އިންތިޚާބުގެ ރަސްމީ ނަތީޖާ އިޢުލާން ކުރަން ނިންމާފައި ވަނީ އެ މަހު 15 ގެ ކުރިންނެވެ.