މާލޭގައި ފުޅާ ދާއިރާގައި ހަށިވިއްކުމުގެ މަސައްކަތް ކުރަމުންދިޔަ ބަޔަކު ހައްޔަރުކޮށްފިއެވެ.

މިމައްސަލައާއި ގުޅިގެން ދިވެހި ފުލުހުން ބުނެފައިވަނީ މާލޭގައި ހިންގަމުންދިޔަ އަލޯރާ ސްޕާ އެންޑް ސެލޫންގައި ހަށިވިއްކަމުންދާ ކަމަށް ލިބުނު އިންޓެލިޖެންސް މައުލޫމާތާއި ގުޅިގެން ޖުލައި 20 ވަނަ ދުވަހުގެރޭ އޮޕަރޭޝަނެއް ހިންގިފައިވާ ކަމަށެވެ.

އަދި މި އޮޕަރޭޝަންގައި ސްޕެޝަލް އޮޕަރޭޝަން، އެންޓި ހިޔުމަށް ޓްރެފިކިންގ ޑިޕާޓްމެންޓް، އިންޓެލިޖެންސް އަދި އިމިގްރޭޝަނުން ބައިވެރިވެފައިވާކަމަށް ފުލުހުން ބުނެފައިވެއެވެ.

Advertisement

ފުލުހުން އިތުރަށް ބުނެފައިވަނީ މި އޮޕްރޭޝަންގައި 34 އަހަރުގެ ބިދޭސީ ދެއަންހެނަކާއި، 43 އަހަރުގެ ބިދޭސީ އަންހެނަކާއި އަދި 39އަހަރު އަދި 38  އަހަރުގެ ދިވެހި 2 ފިރިހެނަކު ހައްޔަރުކޮށްފައިވާ ކަމަށެވެ. އަދި ހައްޔަރުކުރެވުނު އިރު އޭގެ ތެރެއިން އެއްބަޔަކު ތިބީ ނިވާކަން ކުޑަގޮތެއްގައި ކަމަށްވެސް ފުލުހުން ބުނެފައިވެއެވެ.

ފުލުހުން ބުނެފައިވަނީ ހައްޔަރު ކުރި މީހުންގެ ބަންދަށް ގޮތެއް ނިންމުމަށް 21 ޖުލައި ގައި ކްރިމިނަލް ކޯޓަށް ހާޒިރުކުރުމުން 3 އަންހެނުންނަށް 15 ދުވަސް އަދި 38 އަހަރުގެ ފިރިހެން މީހާއަށް 10 ދުވަސް އަދި 39 އަހަރުގެ ފިރިހެންމީހާގެ ބަންދަށް ވަނީ 5 ދުވަސް ޖަހައިފައެވެ.

ފުލުހުން ބުނެފައިވަނީ މިމައްސަލަ އިތުރަށް ތަހްޤީޤު ކުރަމުންދަކަމަށެވެ.