މެޗުގެ އިތުރު ވަގުތުގެ ތެރޭގައި ހިލޭ ޖެހުމަކުން މެސީ ކާމިޔާބުކުރި ލަނޑާއެކު 2-1 ގެ ނަތީޖާއަކުން މެކްސިކޯގެ ކްރޫޒް އަޒުލްގެ މައްޗަށް އެމެރިކާގެ އިންޓަ މިއާމީ އިން ކުރިހޯދައިފިއެވެ.

މިއީ ފާއިތުވެދިޔަ ދެ ސީޒަނުގައި ޕީއެސްޖީއަށް ކުޅުމަށްފަހު މި މަސްތެރޭގައި އިންޓަ މިއާމީއަށް ބަދަލުވި އާޖެންޓީނާގެ ކެޕްޓަން ލަޔޮނަލް މެސީ އެޓީމަށް ކުޅެދިން ފުރަތަަމަ މެޗެވެ. އަދި މިއީ އެންމެ ފަހު ކުޅުނު ހަ މެޗުން މޮޅެއް ހޯދިފައިނުވާ އިންޓަ މިއާމީ ޖޫން 11 ގެ ފަހުން މެޗަކުން މޮޅުވި ފުރަތަަމަ ފަހަރެވެ.

މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިހާފުގައި ކްރޫޒް އަޒުލް އިން ވަނީ ލަނޑުޖަހާނެ ގިނަ ފުރުސަތުތަކެއް ތަނަވަސްކޮށްފައެވެ. އެގޮތުން މެޗުގެ 9 ވަނަ މިނެޓުގައި އެޓީމުގެ ކުޅުންތެރިއަކު ފޮނުވާލި ބާރު ހަމަލާއެއް ގޯލުގެ އަރިމަތީ ދަނޑިއަށް އަމާޒުވިއިރު، މި މެޗުގައި ފުރަތަަމަ ލަނޑުޖަހައި ކުރިހޯދީ އިންޓަ މިއާމީ އިންނެވެ.

Advertisement

މިލަނޑު ފުރަތަމަ ހާފުގެ 43 ވަނަ މިނެޓުގައި ކާމިޔާބުކޮށްދިނީ ފިންލޭންޑުގެ މިޑްފީލްޑަރު ރޮބަޓް ޓެއިލަރ އެވެ. މިއީ އެޓީމުގެ އެމެރިކާ ފޯވާޑް ރޮބީ ރޮބިންސަންސް ތަނަވަސްކޮށްދިން ފުރުސަތެއްގައި ބޯޅައާއެކު ޕެނަލްޓީ އޭރިއާ ތެެރެއަށް ވަދެ ކައިރީގައި ހުރި ކުޅުންތެރިއާ ކައިރިން ނައްޓާލުމަށް ފަހު ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އިންޓަ މިއާމީ ކުރީގައި އޮވެގެންނެވެ.

މެޗުގެ ދެވަަނަ ހާފުގައި އިންޓަ މިއާމީއާ އަލަށް ގުޅުނު މެސީ އަދި ބުސްކެޓްސް ކުޅެން ނުކުތްއިރު، ކްރޫޒް އިން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 65 ވަނަ މިނެޓުގައި ކާމިޔާބުކޮށްދިނީ މެކްސިކޯގެ މިޑްފީލްޑަރު އުރިއެލް އަންޓޫނާ އެވެ. މިއީ އެޓީމުގެ ޖީސަސް ޑުއެނާސް ތަނަވަސްކޮށްދިން ފުރުސަތެއްގައި އިންޓަ މިއާމީ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ފޮނުވާލި ބާރު ހަމަލާއެއް ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުން އިންޓަ މިއާމީ މޮޅުވި ލަނޑު މެޗުގެ އިތުރު ވަގުތުގެ ގޮތުގައި ދެއްކި ހަތަރު މިނެޓުގެ ތެރެއިިން އެންމެ ފަހު މިނެޓްގައި ލިބުނު ހިލޭ ޖެހުމަކުން ކާމިޔާބުކޮށްދިނީ މެސީ އެވެ. މި ލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން އިންޓަ މިއާއމީ ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު އެކު ނޯތު އަދި ސެންޓްރަލް އެމެރިކާގެ ލީގު ކަޕްގެ ގްރޫޕް 10 ގެ އެއްވަނައިގައި މިވަގުތު އޮތީ އިންޓަ މިއާމީ އެވެ. މިގުރޫޕްގައި ދެން ހިމެނެނީ މެކްސިކޯގެ ކްރޫޒް އަޒުލްގެ އިތުރުން އެމެރިކާގެ އެޓްލާންޓާ ޔުނައިޓެޑެވެ.