މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގައި  މިއަދު ހެނދުނު ކުޅެވުނު ގްރޫޕް އީގެ ފުރަތަމަ މެޗުގައި އެންމެ ފަހުގެ ޗެމްޕިއަން އެމެރިކާ އާއި ވިއެޓްނާމް ވާދަކުރި މެޗު ފަސޭހަކަމާއި 3-0 ގެ ނަތީޖާއަކުން އެމެރިކާ ކާމިޔާބުކޮށްފިއެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ އެމެރިކާ އިންނެވެ. މި ހާފުގައި އެޓީމުން 16 ހަމަލާއެއް ވިއެޓުނާމުގެ ގޯލަށް ފޮނުވާލި އިރު، މި މެޗުގައި އެޓީމުން ކާމިޔާބުކުރި ފުރަތަމަ ލަނޑު މެޗުގެ 14 ވަނަ މިނެޓުގައި ކާމިޔާބުކޮށްދިނީ ޒުވާން ފޯވާޑް ސޯފިއާ ސްމިތް އެވެ. މިއީ އެޓީމުގެ ތަޖުރިބާކާރު ފޯވާޑް އެލެކްސް މޯގަން ތަނަވަސްކޮށްދިން ފުރުސަތެއްގައި ބޯޅައާއެކު ޕެނަލްޓީ އޭރިއާ ތެރެއަށް ވަދެ ތިރިތިރިން ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

އެމެރިކާގެ ލީގު ފުޅާކުރުމަށް ފުރަތަމަ ހާފުގެ 43 ވަނަ މިނެޓުގައި އެޓީމަށް ވަނީ ޕެނަލްޓީއެއް ވެސް ލިބިފައެވެ. ނަމަވެސް އެލެކްސް މޯގަން ފޮނުވާ ޕެނަލްޓީ ވިއެޓުނާމުގެ ކީއްޕަރު ވަނީ ހުޝިޔާރުކަމާއެކު ދިފާއުކޮށްފައެވެ.

Advertisement

މި މެޗުގައި އެމެރިކާ އިން ކާމިޔާބުކުރި ދެވަނަ ލަނޑު ފުރަތަމަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ވެސް ސޯފިޔާ ސްމިތް އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން އެމެރިކާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ އެމެރިކާ އިންނެވެ. އަދި މި ހާފުގައި ވެސް އެޓީމުން ގިނަ ހަމަލާތަކެއް ވިއެޓުނާމުގެ ގޯލަށް ފޮނުވާލިއިރު، މިހާފުގައި ވިއެޓުނާމުގެ ފަރާތުން ވަނީ ރަގަޅު ޑިފެންސިވް ކުޅުމެއް ފެނިގެން ގޮސްފައެވެ.

މި މެޗުގައި އެމެރިކާ އިން ކާމިޔާބުކުރި ތިންވަނަ ލަނޑު ދެވަނަ ހާފުގެ 77 ވަނަ މިނެޓުގައި ކާމިޔާބުކޮށްދިނީ ލިންޑްސޭ ހޯރަން އެވެ. މިއީ މި މެޗުގައި މޮޅު ކުޅުމެއް ދެއްކި ސޯފިޔާ ސްމިތް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 3-0 ގެ ނަތީޖާއަކުން އެމެރިކާ ކުރީގައި އޮވެގެންނެވެ. މި މެޗުގެ މޮޅު ކުޅުންތެރިއަކަށް ހޮވުނީ އެމެރިކާގެ ފުރަތަަމަ ދެ ލަނޑު ކާމިޔާބުކޮށްދިން ސޯފިޔާ ސްމިތް އެވެ.

މި މެޗުން ލިބުނު ތިން ޕޮއިންޓާއެކު އެކު ގްރޫޕް އީގެ އެއްވަނައިގައި މިވަގުތު އޮތީ އެމެރިކާ އެވެ. މި ގުރޫޕްގައި ދެން ހިމެނެނީ ވިއެޓުނާމުގެ އިތުރުން ޕޯޗުގަލް އާއި ނެދަލޭންޑްސް އެވެ