މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް ޑީގައި މިއަދު ހަވީރު އޭޝިޔާގެ ޗެންޕިއަން ޗައިނާ 1-0 ގެ ނަތީޖާއަކުން ބަލިކޮށް ޑެންމާކް އިން މުބާރާތުގެ ފެށުން ރަނގަޅުކޮށްފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަަމަ ހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ޑެންމާކް އިން އެޓީމުގެ އެޓޭކުތައް އިތުރަށް ވަރުގަދަކުރި ނަމަވެސް ޗައިނާގެ ގޯލާއި އަމާޒުކޮށް މިހާފުގައި ފޮނުވާލެވިފައި ވަނީ އެންމެ ހަމަލާއެކެވެ. އަދި މި މެޗުގައި ފެނިގެންދިޔަ ހަމައެކަނި ލަނޑު ދެވަނަ ހާފުގެ 90 ވަނަ މިނެޓުގައި ކާމިޔާބުކޮށްދިނީ އެޓީމުގެ ޕީއެސްޖީ ފޯވާޑް އެމްލީ ވެންގްސްގާޑް އެވެ.

Advertisement

މިއީ އެޓީމުގެ ބަޔާން މިއުނިކް މިޑްފީލްޑަރު ޕަނީލް ހާޑާ ކޯނަރަކުން ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.  މި ލަނޑާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ޑެންމާކް ކުރީގައި އޮވެގެންނެވެ.

މި މޮޅާއެކު 1995 ގެ ފަހުން ޑެންމާކް އަށް އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ދެވަނަބުރު އުންމީދު އާވިއިރު، މިހާތަނަށް އަންހެނުންގެ ވޯލްޑްކަޕްގެ ގުރޫޕް ސްޓޭޖުން ޗައިނާ ކަޓަފައެއް ނުވެއެވެ.

މި މެޗުން ލިބުނު ތިން ޕޮއިންޓާއެކު ގްރޫޕް ޑީގައި ކުރީގައި މިވަގުތު އޮތީ ތިން ޕޮއިންޓާއެކު އިންގްލެންޑް އަދި ޑެންމާކް އެވެ. މިގުރޫޕްގައި ދެން ހިމެނޭ ހައިޓީ ގެ އިތުރުން ޗައިނާ އަށް އަދި ޕޮއިންޓެއް ނުލިބެއެވެ.