މޯލްޑިވްސް ރިފޯމް މޫވްމެންޓް(އެމްއާރްއެމް) އިން ކުރިއަށްއޮތް ރިޔާސީ އިންތިޚާބުގައި ވާދަކުރައްވާނީ ކުރީގެ ރައީސް މައުމޫނު ޢަބްދުލް ޤައްޔޫމް ގެ ދަރިކަލުން ފާރިސް މައުމޫން ކަމަށް އެޕާޓީއިން ހާމަކޮށްފިއެވެ.
އެމްއާރްއެމްގެ ފަރާތުން މައުލޫމާތު ދެއްވަމުން އެޕާޓީގެ ސެކްރެޓަރީ ޖެނެރަލް އަބްދުލްއަލީމް އާދަމް "ވޮއިސް" އަށް ވިދާޅުވީ އެމްއާރްއެމްގެ ފަރާތުން ރިޔާސީ އިންތިޚާބަށް ފާރިސް ނެރުމުގެ މަސައްކަތް ދަނީ ކުރަމުންދާ ކަމަށެވެ. އަދި ރަސްމީކޮށް އިޢުލާނު ކުރާނީ ކޯޓަށް ހުށައެޅިފައިވާ ޕާޓީގެ މެމްބަރުން ހަމަނުވާތީ ޕާޓީ އުވާލުމާއި ގުޅޭ މައްސަލަ ނިމުމުން ކަމަށެވެ.
ޢަލީމް ވިދާޅުވީ އެމްއާރްއެމް އިން ކެނޑިޑޭޓެއްގެ ގޮތުގައި ނެރުމަށް ނިންމާފައިވާ ކަމަށެެވެ. އަދި ޕާޓީގެ މައްސަލަ ކޯޓުގައި އޮތުމުން ފާރިސް ނުކުންނަވާނީ އެމްއާރްއެމްގެ ފަރާތުންތޯ ނުވަތަ މިނިވަން ކެނޑިޑޭޓެއްގެ ގޮތުގައި ތޯ މަޝްވަރާކުރެވުމުން ދާކަމަށެވެ. އަދި އެބޭފުޅުންގެ އުންމީދަކީ ޕާޓީގެ ކެނޑިޑޭޓެއްގެ ގޮތުގައި ފާރިސް ނެރުން ކަމަށް ވެސް ޢަލީމް ވިދާޅުވިއެވެ.
ޢަލީމް ވިދާޅުވީ ކޮމަން ކެނޑިޑޭޓެއް ނެރުމާއި މެދު އެއްވެސް ޕާޓީއަކާއި މަޝްވަރާ ނުކުރާ ކަމަށެވެ.
ރައީސް ޔާމިން ޢަބްދުލްޤައްޔޫމްގެ އެދި ލެއްވުމަކަށް އެމްއާރްއެމް އާއި ޕީޕީއެމް ޕީއެންސީ ކޯލިޝަނާއި މަޝްވަރާކުރެވުނު ކަމަށް ބައެއް ނޫސްތަކުން ކުރި ރިޕޯޓް ޢަލީމް ވަނީ ދޮގުކުރައްވާފައެވެ.
އެމްއާރްއެމްގައި މިވަގުތު ތިބީ 2،892 މެންބަރުން ކަމަށް އީސީގެ ލިސްޓުގައިވެއެވެ. ނަމަވެސް ޢަލީމް ވިދާޅުވީ ޕާޓީގައި 3000 މެމްބަރުން ހަމަވެފައިވާ ކަމަށާއި، އެކަމުގެ ހެކި ކޯޓަށް ހުށައެޅިފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
