މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް ޖީގައި މިއަދު ހެނދުނު ކުޅެވުނު މެޗުގައި 2-1 ގެ ނަތީޖާއަކުން ސައުތު އެފްރިކާ ބަލިކޮށް ސްވިޑެން އިން މުބާރާތުގެ ފެށުން ރަނގަޅުކޮށްފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަަމަ ހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ފެށިގެން ތިންވަނަ މިނެޓުގައި ސައުތު އެފްރިކާ އިން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މި ލަނޑު އެޓީމަށް ކާމިޔާބުކޮށްދިނީ މިޑްފީލްޑަރު ހިލްދާ މަގިޔާ އެވެ. ސްވިޑަން އިން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 65 ވަނަ މިނެޓުގައި ކާމިޔާބުކޮށްދިނީ އެޓީމުގެ ބާސެލޯނާ ފޯވާޑް ފްރްޑިލީނާ ރޯލްފޯ އެވެ.

Advertisement

މިއީ އެޓީމުގެ ޗެލްސީ މިޑްފީލްޑަރު ޖޮހާނާ ރައިޓިން ކަނެރިޑް ހުރަސްކޮށްދިން ބޯޅައެއް ސައުތު އެފްރިކާގެ ގޯލް އޭރިޔާ ތެރޭގައި މުޅިން ހުސްކޮށް ހުރެ ފޮނުވާލި ބޯޅަ ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. އަދި މި މެޗުން ސްވިޑެން މޮޅުވި ލަނޑު ދެވަނަ ހާފުގެ 89 ވަނަ މިނެޓުގައި ކާމިޔާބުކޮށްދިނީ އެޓީމުގެ ޕީއެސްޖީ ޑިފެންޑަރު އަމަންޑާއެވެ.

މިއީ އެޓީމަށް ލިބުނު ކޯނަރަކުން ކޮސޯވަރޭ އަސްލާނީ ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މި ލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ސްވިޑެން ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ގްރޫޕް ޖީގެ އެއްވަނައިގައި ސްވިޑެން މިވަގުތު އޮތްއިރު، މި ގުރޫޕްގައި ދެން ހިމެނެނީ ސައުތު އެފްރިކާގެ އިތުރުން އިޓަލީ އަދި އާޖެންޓީނާ އެވެ.