މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް އީގައި މިއަދު ކުޅެވުނު މެޗުގައި ވާދަވެރި ކުޅުމަކަށްފަހު 1-0 ގެ ނަތީޖާއަކުން ޕޯޗުގަލް ބަލިކޮށް ނެދަލެންޑްސް އިން ދެވަނަ ބުރުގެ ފުރުސަތު ބޮޑުކޮށްފި އެވެ.

މި މެޗުގެ ފުރަތަަމަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މިހާފުގައި ލަނޑުޖަހާނެ ރަގަޅު ފުރުސަތުތަކެއް ތަނަވަސްކުރީ ނެދަލޭންޑްސް އިންނެވެ. އެގޮތުން މި ހާފުގައި އެޓީމުން ޕޯޗުގަލްގެ ގޯލަށް 7 ހަމަލާއެއް ފޮނުވާލާފައި ވާއިރު، އެޓީމުން މެޗުގެ ލީޑު ހޯދީ ފުރަތަަމަ ހާފުގެ 13 ވަނަ މިނެޓުގައެވެ.

މިލަނޑު އެޓީމަށް ކާމިޔާބުކޮށްދިނީ އެޓީމުގެ އިންޓަ މިލާން ޑިފެންޑަރު ސްޓެފެނީ ވެންޑަރ ގްރޭޓް އެވެ. މިއީ އެޓީމަށް ލިބުނު ކޯނަރަކުން މިޑްފިލްޑަރު ޝެރިދާ ސްޕިޓްސް ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

Advertisement

މިހާފުގައި ޕޯޗުގަލް ޓީމަށް ނެދަލޭންޑްސްގެ ގޯލާއި އަމާޒުކޮށް އެންމެ ހަމަލާއެއް ވެސް ފޮނުވާލެވިފައި ނުވާއިރު، ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ނެދަލޭންޑްސް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ޕޯޗުގަލް އިން އެޓީމުގެ ކުޅުން ރަނގަޅުކޮށް ލަނޑެއް ޖެހޭތޯ ވަރަށް މަސައްކަތް ކުރި ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ނެދަލޭންޑްސް ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ނެދަލޭންޑްސް މިވަގުތު އޮތީ ގްރޫޕް އީގެ ދެވަނައިގައެވެ. މި ގުރޫޕްގެ އެއްވަނައިގައި ލަނޑުގެ ތަފާތުން އޮތީ އެމެރިކާ އެވެ. ތިންވަނައިގައި ޕޯޗުގަލް އޮތް އިރު ހަތަރު ވަނައިގައި އޮތީ ވިއެޓުނާމު އެވެ.