ވާދަވެރި ސިޔާސީ ޕާޓީ، ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން ރިޔާސީ އިންތިޚާބުގައި ވާދަނުކުރާނަމަ، އެ އިންތިޚާބަކީ މިނިވަން، އިންސާފުވެރި އިންތިޚާބަކަށް ނުވާނެކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވެއްޖެ އެވެ. 

ފުއާދު ތައުފީގު މިފަދައިން ވިދާޅުވެފައި ވަނީ ވަގުތު ޓީވީގެ ތަފްސީލީ ޕްރޮގްރާމުގައި ކުރި ސުވާލަކަށް ޖަވާބުދެއްވަމުން ނެވެ. 

ރިޔާސީ އިންތިޚާބަށް ކުރިމަތިލުމުގެ ފުރުސަތު ހުޅުވާލާފައި ވާއިރު، ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމު ގެންދަވަނީ އެމަނިކުފާނުގެ މއްޗަށް މިދިޔަ ޑިސެމްބަރު މަހުގެ 25 ގައި ކުރިމިނަލް ކޯޓުން ކުރި 11 އަހަރުގެ ޖަލު ހުކުމެް ތަންފީޒު ކުރައްވަމުން ނެވެ. 

Advertisement

އެ ހުކުމަކީ ވ އާރަށް ކުއްޔަށް ދޫކުރުމުގެ މުއާމަލާތާއި ގުޅުވާ ރައީސް ޔާމިނުގެ މައްޗަށް އުފުލާފައިވާ ދައުވާތައް ސާބިތުވާކަމަށް ކަނޑައަޅާ އިއްވި ހުކުމެކެވެ. އެމަނިކުފާނުގެ ފަރާތްޕުޅުން ވަނީ އެ ހުކުމް ހައިކޯޓުގައި އިސްތިއުނާފުކޮށްފަ އެވެ. 

އެހެން ނަމަވެސް ހައިކޯޓުގައި އޮތް އެ މައްސަލައިގެ އިސްތިއުނާފު އޮތީ މަޑުޖައްސާލާފަ އެވެ. 

އެއާއެކުވެސް ޕީޕީއެމުން ބުނަމުންދަނީ އެ ޕާޓީގެ ރިޔާސީ ކެންޑިޑޭޓަކީ ރައީސް ޔާމީން ކަމަށެވެ. 

އެހެންކަމުން އެމަނިކުފާނަށް ކުރިމަތި ނުލެވޭ ހާލަތެއްގައި ޕީޕީއެމުން ރިޔާސީ އިންތިޚާބު ބޮއިކޮޓް ކުރުމުގެ ފުރުސަތު އޮތްކަމަށް ސިޔާސީ މަޝްރަހު ދިރާސާ ކުރައްވާ ބައެއް ބޭފުޅުން ވިދާޅުވަމުންދާއިރު، އެފަދަ ހާލަތެއްގައި ބާއްވާ އިންތިޚާބާއި ގުޅޭގޮތުން ދެކިވަޑައިގަންނަވާ ގޮތަކީ ކޮބައިތޯ ތަފްސީލީ ޕްރޮގްރާމުގައި ވަނީ ފުއާދާއި ސުވާލުކޮށްފަ އެވެ. 

އެ ސުވާލަށް ޖަވާބުދެއްވަމުން ފުއާދު ވިދާޅުވީ، ޕީޕީއެމްއަކީ ރާއްޖޭގެ އާބާދީގެ ވަރަށް ގިނަ ބަޔެއް ތަމްސީލުވާ ޕާޓީއެއް ކަމަށެވެ. އަދި ޕީޕީއެމުން އިންތިޚާބު ބޮއިކޮޓްކޮށްފި ނަމަ، ރިޔާސީ އިންތިޚާބަކީ މިނިވަން އިންސާފުވެރި އިންތިޚާބަކަށް ނުވާނެކަމަށް ފުއާދު ވިދާޅުވި އެވެ. 

ފުއާދު އިތުރަށް ވިދާޅުވީ ޕީޕީއެމުން އިންތިޚާބު ބޮއިކޮޓް ނުކުރާނެކަމަށް އުންމީދު ކުރައްވާކަމަށެވެ. އަދި މިހާރު އެ ޕާޓީއަށް ދިމާވެފައިވާ މައްސަލައަށް އިންތިޚާބު "ބޮއިކޮޓު" ނުކޮށް ޙައްލެއް ހޯއްދަވާނެ ކަމަށެވެ. 

ޕީޕީއެމުން ވެސް އެފަދަ ހުރިހާ ހާލަތަކަށް ވިސްނާނެކަމަށް ޤަބޫލުފުުކުރައްވާ ކަމަށް ފުއާދު ވިދާޅުވި އެވެ.