އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް ޑީގައި މިއަދު ހެނދުނު ކުޅުނު މެޗުގެ ފަހުވަގުތު ކާމިޔާބުކުރި ލަނޑާއެކު 1-0 ގެ ނަތީޖާއަކުން އާޖެންޓީނާ އަތުން އިޓަލީ މޮޅުވެއްޖެ އެވެ.

މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި އިޓަލީ އިން އެޓީމުގެ އެޓޭކުތައް އިތުރަށް ވަރުގަދަކުރި މިހާފުގައި އޭޓީމުން ވަނީ އާޖެންޓީނާގެ ގޯލަށް ގިނަ ހަމަލާތަކެއް ފޮނުވާލާފައެވެ. އަދި މި މެޗުން އެޓީމު މޮޅުވި ލަނޑު މެޗު ނިމެން ތިން މިނިޓަށްވެފައި ވަނިކޮށް ކާމިޔާބުކޮށްދިނީ އެޓީމުގެ ޔުވެންޓަސް ފޯވާޑް ކްރިސްޓިއާނޯ ގިރެލީ އެވެ.

މިއީ އެޓީމުގެ ޔުވެންޓަސް ޑިފެންޑަރު ލީސާ ބޯޓިން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މި ލަނޑާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން އިޓަލީ ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ގުރޫޕް ބީގެ ދެވަނައިގައި އިޓަލީ އޮތްއިރު، މި ގުރޫޕްގެ އެއްވަނައިގައި އޮތީ ސްވިޑެން އެވެ. އަދި މި ގުރޫޕްގައި ދެން ހިމެނޭ އާޖެންޓީނާ އަދި ސައުތު އެފްރިކާ އަށް ޕޮއިންޓެއް ނުލިބެއެވެ. ގުރޫޕްގެ ދެވަނަ މެޗުގައި އިޓަލީ މިމަހުގެ 29 ވަނަ ދުވަހު ނުކުންނާނީ ސްވިޑެން އާއި ދެކޮޅަށެވެ. އަދި 28 ވަނަ ދުވަހު އާޖެންޓީނާ ނުކުންނާނީ ސައުތު އެފްރިކާ އާއި ދެކޮޅަށެވެ.