އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް އެޗްގައި މޮރޮކޯ އާއި ދެކޮޅަށް ކުޅުނު މެޗު 6-0 ގެ ތަފާތުބޮޑު ނަތީޖާއަކުން ޖަރުމަނު ކާމިޔާބުކޮށްފިއެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ ޖަރުމަނު އެވެ. މިހާފުގައި އެޓީމުން މޮރޮކޯގެ ގޯލަށް ގިނަ ހަމަލާތަކެއް ފޮނުވާލާފައިވާ އިރު، މި މެޗުގައި އެޓީމުން ކާމިޔާބުކުރި ފުރަތަމަ ލަނޑު ފުރަތަމަ ހާފުގެ 11 ވަނަ މިނެޓުގައި ކާމިޔާބުކޮށްދިނީ އެޓީމުގެ ވުލްފްސްބާގް މިޑްފީލްޑަރު  އެލެކްޒެންޑްރާ ޕޮޕްއެވެ. މިއީ އެޓީމުގެ ޑިފެންޑަރު ކެތްރީން ހެންޑްރިޗް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ޖަރުމަނު ޓީމުން މި މެޗުގައި ކާމިޔާބުކުރި ދެވަނަ ލަނޑު ފުރަތަމަ ހާފުގެ 39 ވަނަ މިނެޓުގައި ކާމިޔާބުކޮށްދިނީ ވެސް ޕޮޕް އެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ޖަރުމަނު ކުރީގައި އޮވެގެންނެވެ.

މެޗުގެ ދެވަަނަ ހާފުގައި ޖަރުމަނު ޓީމުން އިތުރު ހަތަރު ލަނޑު ކާމިޔާބުކުރިއިރު، މި މެޗުގައި އެޓީމުން ކާމިޔާބުކުރި ތިންވަނަ ލަނޑު ދެވަނަ ހާފުގެ ފެށިގެން ފުރަތަަމަ މިނެޓުގައި ކާމިޔާބުކޮށްދިނީ އެޓީމުގެ ބަޔާން މިއުނިކް މިޑްފީލްޑަރު ކްލާރާ ބުހްލް އެވެ.

މި މެޗުގައި ޖަރުމަނު ޓީމުން ކާމިޔާބުކުރި ހަތަރުވަނަ ލަނޑަކީ ފަހު ހާފުގެ 54 ވަނަ މިނެޓުގައި މޮރޮކޯގެ ޑިފެންޑަރު ހަނާނޭ އައިތު އެލް ހާޖް އަތުން ބައިކޮޅަށް ވަން ލަނޑެކެވެ. އަދި އެޓީމުގެ ފަސްވަނަ ލަނޑަކީ ވެސް މޮރޮކޯ ޑިފެންޑަރު ޒައިނަބު އަތުން ބައިކޮޅަށް ވަން ލަނޑެކެވެ.

ޖަރުމަނު ޓީމުން ކާމިޔާބުކުރި ހަ ވަނަ ލަނޑު މެޗުގެ އެންމެ ފަހު މިނެޓްގައި ކާމިޔާބުކޮށްދިނީ އެޓީމުގެ ބަޔާން މިއުނިކް ފޯވާޑް ލީ ޝޫލަރ އެވެ. މި ލަނޑާއެކު މެޗުގެ ކުޅުން ނިމިގެންދިޔައީ 6-0 ގެ ނަތީޖާއަކުން ޖަރުމަނު ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު އެޗުގެ އެއްވަނައިގައި މިވަގުތު އޮތީ ޖަރުމަނެވެ. މި ގުރޫޕްގައި މޮރޮކޯގެ އިތުރުން ދެން ހިމެނެނީ ސައުތު ކޮރެއާ އާއި ކޮލަންބިއާ އެވެ.