އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް އެފްގައި މިއަދު ކުޅެވުނު މެޗުގައި 4-0 ގެ ނަތީޖާއަކުން ޕެނަމާ ބަލިކޮށް، ބްރެޒިލް އިން ގުރޫޕްގެ އެއްވަނައަށް ކުރިއަށް ޖެހިލައިފި އެވެ.

ބްރެޒިލްގެ ފަރާތުން ތަފާތު މޮޅު ކުޅުމެއް ފެނިގެންދިޔަ މިމެޗުގައި އެޓީމުން ކާމިޔާބުކުރި ފުރަތަމަ ލަނޑު، ފުރަތަމަ ހާފުގެ 19 ވަނަ މިނެޓުގައި ކާމިޔާބުކޮށްދިނީ ޒުވާން މިޑްފީލްޑަރު އެރީ ބޯރހެސް އެވެ.

މިއީ އެޓީމުގެ މިޑްފިލްޑަރު ޑެބިންހާ އަރިމަތިން ހުރަސްކޮށްދިން ބޯޅައެއް ޕެނަމާގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި އެޓިމުގެ ދެވަނަ ލަނޑު 39 ވަނަ މިނެޓުގައި ކާމިޔާބުކޮށްދިނީ ވެސް އެރީ އެވެ. މިއީ ވެސް އެޓީމުގެ ކުޅުންތެރިއަކު އަރިމަތިން ހުރަސްކޮށްދިން ބޯޅައެއް އެރީ ބޮލުން ފޮނުވާލުމުން ޕެނަމާގެ ކީއްޕަރު ދިފާއުކޮށް ބޭރަށް ނެރުނު ބޯޅަ މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

Advertisement

މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ބްރެޒިލް ކުރީގައި އޮވެގެންނެވެ. މިހާފުގައި ބްރެޒިލް އިން ޕެނަމާގެ ގޯލަށް 16 ހަމަލާއެއް ފޮނުވާލިއިރު، ޕެނަމާއަށް މި ހާފުގައި ބްރެޒިލްގެ ގޯލަށް ފޮނުވާލެވުނީ އެންމެ ހަމަލާއެކެވެ.

މެޗުގެ ދެވަަނަ ހާފުގައި ބްރެޒިލް އިން އެޓީމުގެ އެޓޭކުތައް އިތުރަށް ވަރުގަދަކުރި އިރު، މި މެޗުގައި އެޓީމުން ކާމިޔާބުކުރި ތިންވަނަ ލަނޑު ދެވަނަ ހާފު ފެށިގެން ތިންވަނަ މިނެޓުގައި ކާމިޔާބުކޮށްދިނީ ތަޖުރިބާކާރު މިޑްފިލްޑަރު ބިއާ ޒަނެރަޓޯ އެވެ.

މިއީ އެޓީމުގެ އެރީ ބޯރހެސް މުޅިން ހުސްކޮށްލާފައި ފުންނާބު ޖައްސާލި ބޯޅައެއް ޕެނަމާގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ފޮނުވާލި ބޯޅަ ގޯލުގެ މަތީ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުގައި ބްރެޒިލް އިން ކާމިޔާބުކުރި ހަތަރުވަނަ ލަނޑު ފަހުހާފުގެ 70 ވަނަ މިނެޓުގައި ކާމިޔާބުކޮށްދީ އެރީ ބޯރހެސް މި މެޗުގައި އޭނާގެ ހެޓްރިކް ފުރިހަމަކުރި އިރު، މިއީ މި ފަހަރުގެ ވޯލްޑް ކަޕް ފުޓްބޯޅަ މުބާރާތުގައި މިހާތަނަށް ފެނިގެންދިޔަ ފުރަތަަމަ ހެޓްރިކެވެ. މި ލަނޑާއެކު މެޗުގެ ކުޅުން ނިމިގެންދިޔައީ 4-0 ގެ ނަތީޖާއަކުން ބްރެޒިލް ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ގްރޫޕް އެފްގެ އެއްވަނައިގައި މިވަގުތު އޮތީ ބްރެޒިލް އެވެ. އެޓީމަށް ތިން ޕޮއިންޓް ލިބިފައިވާއިރު، މިގުރޫޕްގައި ހިމެނޭ ފްރާންސް އަދި ޖެމެއިކާ މިއިން ކޮންމެ ޓީމަކަށް އެއް ޕޮއިންޓް ވަނީ ލިބިފަ އެވެ. މި ގުރޫޕްގެ ފުލުގައި އޮތީ ޕޮއިންޓެއް ނުލިބި އޮތް ޕެނަމާ އެވެ.