އިލެކްޝަންސް ކޮމިޝަން (އީސީ) ގެ މެންބަރު ކަމުގައި ހުންނެވި އަލީ ނަޝާތުގެ ފަސް އަހަރުގެ ދައުރު ހަމަވެ، އީސީގެ ގާނޫނީ އަދަދު ގެއްލިއްޖެއެވެ.

ނަޝާތުގެ ދައުރު ހަމަވުމާއި ގުޅިގެން އީސީން މިއަދު ކޮށްފައިވާ ޓުވީޓެއްގައި ވަނީ، މިވީ ފަސް އަހަރުގެ ދައުރުގައި އޭނާ އެ ކޮމިޝަނަށް ކޮށްދެއްވި މަސައްކަތަށް ޝުކުރު އަދާކޮށްފައެވެ. 

ނަޝާތު، އީސީގެ މެންބަރު ކަމަށް އައްޔަން ކޮށްފައި ވަނީ ޖުލައި 25، 2018 ގައި ކުރީގެ ރައީސް އަބްދުالله ޔާމީންގެ ވެރިކަމުގަ އެވެ. އަދި އޭނާގެ ދައުރު ހަމަވާތީ، އެ މަގާމަށް އޭނާ އަލުން އައްޔަން ކުރުމަށް ރައީސް އިބްރާހިމް މުހައްމަދު ސޯލިހު ރައްޔިތުންގެ މަޖިލިހަށް ފޮނުއްވައިފައިވީ ނަމަވެސް، އެކަން ކުރެވުމުގެ ކުރިން މަޖިލިސް ވަނީ ޗުއްޓީއަށް ގޮސްފައެވެ. 

Advertisement

ނަޝާތުގެ ދައުރު ހަމަވެފައި މިވަނީ އީސީގެ މެންބަރުންގެ މެދުގައި ދެބަސްވުންތައް އުފެދި ބައިބައި ވެފައިވަނިކޮށެވެ. އެގޮތުން އީސީގެ ރައީސް ފުއާދުގެ އިތުބާރު ނެތް ކަމަށް އެ ކޮމިޝަންގެ މެމްބަރުން މިދިޔަ ހަފުތާގައި ފާސްކޮށްފައިވާއިރު، ފުއާދު ބައިވެރިވާ ޖަލްސާތައް ބޮއިކޮޓް ކުރަންވެސް އެ މެންބަރުން ނިންމެވި ކަމުގެ އަޑު ވަނީ ފެތުރިފަ އެވެ.