އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް އޭގައި މިއަދު މެންދުރު ކުޅެވުނު މެޗުގައި 0-0 ގެ ނަތީޖާއަކުން ސްވިޒަލޭންޑް އާއި އެއްވަރުވެ މުބާރާތުގެ ދެވަނަ ބުރަށް ދިއުމަށް ނޯވޭގެ އަމިއްލަ ބާރު އެޓީމަށް ގެއްލިއްޖެ އެވެ.

މުބާރާތުގައި ސްވިޒަލޭންޑް ކުޅުނު ފުރަތަމަ މެޗުގައި ފިލިޕީންސް އަތުން މޮޅުވެފައިޗާއިރު، ނޯވޭ ވަނީ އެޓީމު ކުޅުނު ފުރަތަމަ މެޗުގައި ނިއުޒިލޭންޑް އަތުން ބަލިވެފައެވެ. މި މެޗުން މޮޅުވެ މުބާރާތުގެ ދެވަނަ ބުރުން ޖަގައެއް ކަށަވަރުކުރުމުގެ ފުރުސަތު ސްވިޒަލޭންޑަށް އޮތްއިރު، މެޗުގެ ފުރަތަަމަ ހާފުގައި ދެޓީމުގެ ފަރާތުން ފެނިގެން ގޮސްފައި ވަނީ ވަރަށް ހަމަހަމަ ކުޅުމެކެވެ.

މި ހާފުގާއި ދެޓީމުންކުރެ އެއްވެސް ޓީމަކަށް ލަނޑުހާނެ މާރަގަޅު ހުސް ފުރުސަތުތަކެއް ލިބިފައި ނުވާއިރު، ފުރަތަމަ ހާފުގެ ކުޅުން ނިމިގެންދިޔައީ 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ނޯވޭ އިން ވަނީ އެޓީމުގެ ކުޅުން ރަނގަޅުކޮށް ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މިހާފުގައި އެޓީމަށް ލިބުނު ހުސް ފުރުސަތުތަކުގެ ބޭނުން ނުކުރެވި މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މި ނަތީޖާ އެކު ގްރޫޕުގެ ހަތަރު ޓީމަށް ވެސް ދެވަނަ ބުރަށް ދިއުމުގެ ފުރުސަތު ހުޅުވިގެން ދިޔައިރު، ގްރޫޕް ފަހު މެޗުގައި ފިލިޕީންސް އަތުން މޮޅުވުން ނޯވޭއަށް ވަނީ މަޖުބޫރުވެފަ އެވެ.

މި މެޗުން ލިބުނު ތިން ޕޮއިންޓާއެކު އެކު ކުޅުނު ދެ މެޗުން ހަތަރު ޕޮއިންޓް ހަމަކޮށް ގްރޫޕު އޭގެ އެއްވަނައިގައި މިވަގުތު އޮތީ ސްވިޒަލޭންޑް އެވެ. ދެވަނައިގައި އޮތް ނިއުޒިލޭންޑް އާއި ތިންވަނައިގައި އޮތް ފިލިޕީންސް އަށް ހަތަރު މެޗު ކުޅެގެން ތިން ޕޮއިންޓް ލިބިފައިވާއިރު، ގުރޫޕްގެ ފުލުގައި އޮތީ އެއް ޕޮއިންޓާއެކު އޮތް ނޯވޭއެވެ.