ޤައުމީ މަސްލަހަތައްޓަކައި ކުރިއަށް އޮތް ރިޔާސީ އިންތިޚާބުގައި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން ބައިވެރިވުން މުހިންމުކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވެއްޖެ އެވެ.
"ވޮއިސް" އަށް ދެއްވި އިންޓަވިއުއެއްގައި ފުއާދު ވަނީ ޕީޕީއެމާއި ނުލާ ބާއްވާ ރިޔާސީ އިންތިޚާބެއް މިނިވަން އިންސާފުވެރި އިންތިޚާބަށް ނުވާނެކަމަށް މީގެކުރިން ވިދާޅުވި ވިދާޅުވުން ތަކުރާރު ކުރައްވާފަ އެވެ. އަދި އެފަދައިން ވިދާޅުވާ ސަބަބު ތަފްސީލުކޮށްދެއްވާފަ އެވެ.
އެގޮތުން ފުއާދު ވިދާޅުވީ ޕީޕީއެމަކީ ރާއްޖޭގައި އޮތް ސިޔާސީ ޕާޓީތަކުގެ ތެރެއިން ވަރަށް ގިނަ ބަޔަކު ނިސްބަތްވާ ޕާޓީއެއް ކަމަށެވެ. އަދި މިވަގުތު އިދިކޮޅު ޕާޓީ ކަމަށެވެ.
އިދިކޮޅު ޕާޓީ ނުވަތަ ބޮޑެތި ސިޔާސީ ޕާޓީތައް ވާދަނުކުރާ އިންތިޚާބުތަކަކީ މިނިވަން އިންސާފުވެރި އިންތިޚާބުތަކަކަށް ނުވާނެކަމަށް ޑިމޮކްރެޓިކް ޤައުމުތަކުން ވެސް ބުނަމުން އަންނައިރު، ޕީޕީއެމުން މި އިންތިޚާބުގައި ވާދަކުރުުން މުހިންމުކަމަށް ފުއާދު ވިދާޅުވި އެވެ.
އޭނާ ވިދާޅުވީ ޕީޕީއެމާއި ނުލާ އިންސާފުވެރި އިންތިޚާބެއް ނުބޭއްވޭނެކަމަށް އޭނާ މީގެކުރިން ވިދާޅުވީ، ޕީޕީއެމަށް މިހާރު ދިމާވެފައިވާ ހާލަތަށް ރިއާޔަތްކޮށް، އެ ޕާޓީގެ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމަށް ވާދަނުކުރެވޭނެ ހާލަތެއްގައި އިންތިޚާބު ބޮއިކޮޓު ކުރުމުގެ ވިސްނުމެއް ޕީޕީއެމުން ގެންގުޅިދާނެކަމަށް ބަލައި އެފަދައިން އެކަން ނުކުރުމަށް ދެންނެވުމުގެ ގޮތުން ކަމަށެވެ.
ރިޔާސީ އިންތިޚާބުގައި ޕީޕީއެމުން ވާދަނުކުރަން ނިންމައިފި ނަމަ އެއީ އެ ޕާޓީގެ މެމްބަރުންނަށް ވެވޭ ވަރަށް ބޮޑު ބޭއިންސާފަކަށް ވާނެ ކަމަށާއި، ޤައުމީ މަސްލަހަތަށް އެންމެ ރަނގަޅު ގޮތަކަށް ވާނީ ޕީޕީއެމުން އިންތިޚާބުގައި ވާދަކުރުންކަމަށް ފުއާދު ވިދާޅުވި އެވެ.
"އަޅުގަނޑު އެ މެސެޖު ދިނީ އެބޭފުޅުން އެ ކަނޑައަޅުއްވާފައިވާ ކެންޑިޑޭޓު ބައިވެރި ނުވިޔަސް ވެސް ޕީޕީއެމުން ބައިވެރި ވުމަކީ ޤައުމީ މަސްލަހަތައްޓަކައި، އަދި ޚާއްސަކޮށް ޕީޕީއެމްގެ ސަޕޯޓަރުންނާއި ހެޔޮއެދޭ މީހުންނަށް ވެވޭ ބޭއިންސާފެކޭ.. ޕީޕީއެމުން މީގައި (ރިޔާސީ އިންތިޚާބުގައި) ބައިވެރިވެ ވަޑައިގަތުން މުހިންމޭ"
އީސީގެ ރައީސް ފުއާދު ތައުފީގު
އެކަންކަން ފާހަގަކުރައްވާ ފުއާދު ވިދާޅުވީ ޕީޕީއެމުން މި ކަންކަމާއި ދޭތެރޭ ފުރިހަމަޔަށް ވިސްނާނެކަމަށް އުންމީދުކުރައްވާ ކަމަށެވެ. އަދި އިންތިޚާބުގައި ވާދަކުރާނެކަމަށާއި، ޤައުމީ މަސްލަހަތު އެ ޕާޓީންވެސް ނަގަހައްޓާނެކަމަށް އުންމީދުކުރައްވާ ކަމަށެވެ.
ފުއާދު އިތުރަށް ވިދާޅުވީ ޕީޕީއެމްގެ އިތުރުން ރާއްޖޭގެ ސިޔާސީ މައިދާނުގައި ހަރަކާތްތެރިވާ ހުރިހާ ސިޔާސީ ޕާޓީތަކުން ވެސް ރިޔާސީ އިންތިޚާބުގައި ވާދަކުރުމަކީ މުހިންމު ކަމެއް ކަމަށެވެ. ޤައުމީ ބޮޑެތި ނިންމުންތަކުގައި ގިނަ ބަޔަކު ބައިވެރި ވުމަކީ އެންމެ އިންސާފުވެރި، ގޮތްކަމަށް ފުއާދު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
