ރިޔާސީ އިންތިޚާބުގައި ވާދަކުރާ ކެންޑިޑޭޓުންގެ ހައްޤުތައް ހޯދައިދިނުމުގައި އިލެކްޝަންސް ކޮމިޝަނުން އެއްވެސް ކަހަލަ ތަފާތުކުރުމެއް ނުގެންގުޅޭނެކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވެއްޖެ އެވެ.
އީސީގެ ރައީސް "ފުއާދު" ވޮއިސްއަށް ދެއްވި ޚާއްސަ އިންޓަވިއުގައި ވަނީ އެ ކޮމިޝަންގެ މަސައްކަތްތައް ރާވާފައިވާ ގޮތާއި، ހުރި ގޮންޖެހުންތަކަށް އަލިއަޅުވާލާ މުހިންމު މައުލޫމާތުތަކެއް ހިއްސާ ކުރައްވާފަ އެވެ.
މިއަހަރުގެ ރިޔާސީ އިންތިޚާބުގައި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމަށް ވާދަކުރެވިދާނެތޯ ގިނަ ބަޔަކު ސުވާލު އުފައްދަމުންދާއިރު، އެކަމާއި ގުޅޭގޮތުން ފުއާދު ދެކެވަޑައިގަންނަވާ ގޮތަކީ ކޮބައިތޯ ވޮއިސް އިން ސުވާލުކުރުމުން ފުއާދު ވިދާޅުވީ، މި ވަގުތަކީ އެކަމާއި ގުޅޭގޮތުން އީސީގެ ރައީސްގެ ހައިސިއްޔަތުން ވާހަކަދެއްކުން އެހާ މުނާސަބު ވަގުތުކަމަށް ދެކިވަޑައި ނުގަންނަވާ ކަމަށެވެ.
އެހެން ނަމަވެސް ރައީސް ޔާމިނުގެ ކެންޑިޑެސީ ފޯމު އޮންނަ އުސޫލުގެ ތެރެއިން ބަލައިގަނެ، އެއީ ކެންޑިޑޭޓެއްގެ ގޮތުގައި ކަނޑައެޅޭ ހިސާބުން، އެމަނިކުފާނަށް ވެސް ލިބެންޖެހޭ އިންތިޚާބީ ހައްޤުތައް ކަށަވަރުކުރުމުގެ މަސައްކަތް އިލެކްޝަންސް ކޮމިޝަނުން ކުރާނެކަމަށް ފުއާދު ވިދާޅުވި އެވެ.
އޭގެ އިތުރުން ފުއާދު ވިދާޅުވީ ރިޔާސީ ކެންޑިޑޭޓުންގެ މެދުގައި އިލެކްޝަންސް ކޮމިޝަނުން އެއްވެސް ތަފާތުކުރުމެއް ނުގެންގުޅޭނެ ކަމަށެވެ. އަދި ކެންޑިޑޭޓުންގެ ހައްގުތައް ކަށަވަރުކުރުމަށް ތަފާތު ކުރުމެއްނެތި އިލެކްޝަންސް ކޮމިޝަނުން މަސައްކަތް ކުރަމުން ގެންދާނެ ކަމަށެވެ.
"ކޮންމެ ކެންޑިޑޭޓަކަށް ވިޔަސް، ލިބެންޖެހޭ ހައްޤުތަކެއް ހޯދައިދިނުމަށްޓަކައި އިކެލްޝަންސް ކޮމިޝަނުން ކުރަންޖެހޭ ކަންތައްތަކެއް ކުރާނެ. އިލެކްޝަންސް ކޮމިޝަނުން ތަފާތެއް ނުކުރާނެ އެއްވެސް ދެ ކެންޑިޑޭޓެއް. އެއީ ކުރީގެ ރައީސެކޭ، މިހާރުގެ ރައީސެކޭ އަދި ރައީސްކަން ނުކުރައްވާ އަލަށް ވާދަކުރައްވާ ބޭފުޅެކޭ، ކެންޑިޑޭޓަކަށް ވެއްޖެއްޔާ ހަމަ އެއް ހަމައެއްގެ މަތިން އިލެކްޝަންސް ކޮމިޝަނުން ދެކޭނީ"
އީސީގެ ރައީސް ފުއާދު ތައުފީގު
ކުރިއަށް އޮތް ރިޔާސީ އިންތިޚާބުގެ ވޯޓުލުން ސެޕްޓެމްބަރު މަހުގެ 9 ގައި ބޭއްވުމަށް އިލެކްޝަންސް ކޮމިޝަނުން ވަނީ ނިންމާފަ އެވެ.
މި އިންތިޚާބުގައި އެމްޑީޕީއާއި، ޕީޕީއެމާއި، ޖުމްހޫރީ ޕާޓީގެ އިތުރުން ދަ ޑިމޮކްރެޓްސް އާއި އެމްއެންޕީން ވާދަކުރާނެކަމަށް ވަނީ އިއުލާނުކޮށްފަ އެވެ.
މިއަހަރު ބާއްވާ ރިޔާސީ އިންތިޚާބަކީ ވަރަށް ވާދަވެރި އިންތިޚާބަކަށް ވާނެކަމަށް ސިޔާސީ މަޝްރަހު ދިރާސާކުރައްވާ ފަރާތްތަކުން ދަނީ ވިދާޅުވަމުން ނެވެ. އަދި މި އިންތިޚާބަކީ ގިނަ ބަޔަކު ބައިވެރިވެ ވޯޓު ދޭނެ އިންތިޚާބެއްގެ ގޮތަށް އެ ފަރާތްތައް ދަނީ ސިފަކުރައްވަމުން ނެވެ.
Advertisement
This content is created and paid for by advertisers and does not involve Voice Journalists
