ކިޔަވައިދޭ ގަޑީ ކާކުކަން އެނގޭ ގޮތަށް ތިބުމަށް ޓީޗަރުންނަށް ލާޒިމުކޮށް މުދައްރިސުންގެ ސުލޫކީ މިންގަނޑާ ގުޅޭ އުސޫލެއް އާންމުކޮށްފިއެވެ.

ތައުލީމުގެ ގާނޫނުގެ ދަށުން އާއްމުކުރި ސުލޫކީ މިންގަނޑުގެ މި އުސޫލުގައި ބުނެފައިވާގޮތުން އެ އުސޫލުގެ އޭގެ ބޭނުމަކީ ޓީޗަރުންގެ ފަންނީ އަހުލާގާއި އިޖުތިމާއީ ސުލޫކު ހަރުދަނާކުރުމާ އެކު، ޒަމާނުއްސުރެ ރާއްޖޭގައި ތައުލީމީ ދާއިރާއަށް އޮންނަ ގަދަރާއި އިހުތިރާމް އިތުރުކޮށް، ދެމެހެއްޓުން ކަމަށެވެ.

ހަމަ އެހެންމެ ކިޔަވައިދިނުމުގެ މާހައުލަކީ ބިރުދެއްކުންތަކާއި ތަފާތުކުރުންތަކާއި ބުލީކުރުން ފަދަ ނޭދެވޭ އަސަރުކުރާ ކަންތައްތަކުން ދަރިވަރުންނާއި މުވައްޒަފުންނަށް ރައްކާތެރި މާހައުލެއް ހޯދައިދިނުމަކީވެސް އުސޫލުގެ ބޭނުމެއް ކަމަށް ބުނެފައި ވެއެވެ. 

ޓީޗަރުންގެ ސުލޫކީ މިންގަނޑު ބިނާވަނީ މައިގަނޑު ހަތް އަސާސަށެވެ. އެއީ؛

- ދަރިވަރުންގެ ކަރާމާތާއި ރައްކާތެރިކަން

- ތައުލީމީ ދާއިރާގެ އިތުބާރު

- ދަރިވަރުންގެ ފަރުދީ ތަފާތުތައް

- ފަންނީ އަދި ރަސްމީ ގުޅުން

- ތެދުވެރިކަމާއި އިހުލާސްތެރިކަން

- ޒަމާނާ އެކަށޭނެ އިލްމާއި ފަންނުވެރިކަން

މި އަސާސް ތަކުގެ ތެރެއިން ފަންނީ ގުޅުމާއި ރަސްމީ ގުޅުން ދެމެހެއްޓުމަށް ކޮންމެ މުދައްރިސަކު ވެސް ކުރަންޖެހޭ ކަން ކަމުގެ ތެރޭގައި ފާހަގަކޮށްފައިވާ ކަންކަމުގެ ތެރެއިން (ބ) ގައި ބަޔާން ކޮށްފައިވާ ގޮތުން ޓީޗަރާއި އެކުގައި މަސައްކަތްކުރާ އެހެން މުވައްޒަފުންނާއި ބެލެނިވެރީންނާ މުޢާމަލާތުކުރުމުގައި އެ ޓީޗަރަކު ހުންނަންވާނީ ތިމާއަކީ ކާކުކަން އެނގޭގޮތަށ،ް ސްޓާފް ކާޑު އަޅައިގެން ކަމަށެވެ. 

އަދި އޭގެ (ޅ) ގައި ވާގޮތުން އުނގަންނައިދިނުމުގެ ހަރަކާތްތައް ކުރިއަށްގެންދާ އިރު، އަދި ދަރިވަރުންނާ މުޢާމަލާތް ކުރާއިރު އެ ޓީޗަރަކު ހުންނަންވާނީ ތިމާއަކީ ކާކުކަން އެނގޭ ގޮތަށް ކަމަށްވެސް ބުނެފައިވެއެވެ. 

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަމަށް އައި އިރު ވީ އެންމެ މުހިންމު އެއް ވައުދަކީ މޫނު ބުރުގާ އަޅައިގެން ތިބި ނަމަވެސް ވަޒީފާ އަދާކުރެވޭނެ ކަމަށް ބުނެ ވީ ވައުދެވެ. 

އެހެންނަމަވެސް، ވެރިކަމަށް އައުމަށްފަހު، މޫނުބުރުގާ އެޅި ޓީޗަރުންނަށް އެކި ކަހަލަ ދަތިތައް އެޑިއުކޭޝަން މިނިސްޓްރީން ފޯރުކުރަމުންދާ ކަމަށް ބައެއް ޓީޗަރުން ބުނެއެވެ. އެގޮތުން، ދަރިވަރުންނަށް ކިޔަވައިދޭ ގަޑީގައި މޫނު ބުރުގާ ނޭޅޭނެ ކަމަށް އެ ޓީޗަރުންނަށް އަންގާ ކަމުގެ ތުހުމަތު މީގެ ކުރިންވެސް ކުރެވިފައި އޮތް އިރު، މި އުސޫލުގައި މިހެން އޮތުމުން، އެކަން ކުރަން ބުނެ ނުކުރުމުން އެ ޓީޗަރަކާއިމެދު ފިޔަވަޅުވެސް އެޅޭނެއެވެ. 

މިފަދަ ސަބަބު ތަކާއި ހުރެ، މޫނު ބުރުގާ އަކީ މިސަރުކާރުން ވެރިކަމަށް އަންނަން ވެގެން ދީނަށް ލޯބިކުރާ މީހުންގެ ލޮލުގައި އެޅުވި އަނދުނެއް ކަމުގައި މިހާރު ގިނަ ބަޔަކު ދެކެއެވެ.