ބޮޑުވަމުން އަންނަ ކުދިންނަށް މިނިވަންކަމުގެ މުހިންމުކަން އިހުސާސްކޮށްދޭން ޖެހޭކަމަށް ކުރީގެ ރައީސް ޑރ މުޙައްމަދު ވަހީދު ވިދާޅުވެއްޖެ އެވެ.
ޑރ ވަހީދު މިފަދައިން ވިދާޅުވީ މިނިވަން ދުވަހާއި ގުޅިގެން ބޭއްވި ޚާއްސަ ރިސެޕްޝަނުގައި ދެއްވި އިންޓަވިއުއެއްގަ އެވެ.
ޑރ ވަހީދު ވިދާޅުވީ މިނިވަންކަމުގެ މުހިންމުކަން އިހުސާސްކުރެވޭނީ އެ މިނިވަންކަން ގެއްލިގެން ދިއުމުން ކަމަށެވެ.
އެހެން ނަމަވެސް އެއީ ވަރަށް ބޮޑު ނިއުމަތެއް ކަމަށާއި، އެ ނިއުމަތް ދިވެހިންނަށް ލިބިފައި އޮތް އޮތުން އެގޮތުގައި ދެމެހެއްޓުމަށް އެންމެން ވެސް މަސައްކަތް ކުރަން ޖެހޭ ކަމަށް ޑރ ވަހީދު ވިދާޅުވި އެވެ.
އެގޮތުން މިނިވަންކަމުގެ މުހިންމުކަން ބޮޑުވަމުން އަންނަ ކުދިންނާއި ޒުވާނުންނަށް އިހުސާސްކޮށްދީ ވިސްނައިދޭން ޖެހޭކަމަށް ޑރ ވަހީދު ވިދާޅުވި އެވެ.
"މިނިވަންކަމަކީ ވަރަށް ބޮޑު ނިއުމަތެއް. އެކަން އިހުސާސް ކުރެވޭނީ އެކަން ގެއްލިގެން ދިޔައިމަ. އެހެންކަމުން މިނިވަންކަން ހިމާޔަތްކުރުމަށް އަޅުގަނޑުމެން ކުރަން ޖެހޭ ހުރިހާކަމެއް ކުރަންޖެހޭ. އެހެންވީމަ ޚާއްސަކޮށް އަރަމުން އަންނަ ކުދިންނާއި ޒުވާނުންނަށް އެބަ އިހުސާސްކުރެވެން ޖެހޭ މިކަމުގެ ހުރި މުހިންމުކަން"
ޑރ ވަހީދު
ޑރ ވަހީދު ވަނީ މިނިވަން ދުވަހުގެ ހެޔޮ އެދުމާއި ތަހުނިޔާ ރާއްޖޭގެ ރައްޔިތުންނަށް އަރިސްކުރައްވާފަ އެވެ.
އަދި މިނިވަންކަން ގެއްލިގެންދާނެ ކަންކަން ބަލައި، ގައުމުތަކާއި ގުޅުން ބަދަހިކުރާއިރު އެކަންކަމަށް ސަމާލުވެ ތިބުމަށް ޑރ ވަހީދު ވަނީ އިލްތިމާސްކުރައްވާފަ އެވެ.
Advertisement
This content is created and paid for by advertisers and does not involve Voice Journalists
