އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގައި މިއަދު މެންދުރު ކުޅެވުނު ގްރޫޕް ބީގެ މެޗުގައި ފަހަތުން އަރައި އަޔަލެންޑް ބަލިކޮށް މުބާރާތުގެ ދެވަނަ ބުރުގެ ފުރުސަތު ކެނަޑާއިން ބޮޑުކޮށްފި އެވެ.

ދެޓީމުގެ ފަރާތުން ފޯރިގަދަ ކުޅުމެއް ފެނިގެންދިޔަ މިމެޗު ކެނަޑާއިން ކާމިޔާބުކުރީ 2-1 ގެ ނަތީޖާއަކުންނެވެ. މި މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން ކެނަޑާއިން ކުޅުނު ނަމަވެސް ލަނޑުޖަގާނެ ރަގަޅު ފުރުސަތުތަކެއް ތަނަވަސްކުރީ އަޔަލެންޑް އިންނެވެ. އެގޮތުން މެޗުގެ ވަރަށް ކުރީކޮޅު އެޓީމުން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ.

މި ލަނޑު މެޗު ފެށިގެން ހަތަރުވަނަ މިނެޓުގައި ކާމިޔާބުކޮށްދިނީ އެޓީމުގެ އާސެނަލް ފޯވާޑް ކޭޓީ މެކެބް އެވެ. މިއީ އެޓީމަށް ލިބުނު ކޯނަރަކުން އޭނާ ކާމިޔާބުކޮށްދިން ހިތްގައިމު ލަނޑެކެވެ.

މި މެޗުގައި ކެނަޑާއިން މެޗުގެ ނަތީޖާ އެއްވަރުކުރި ލަނޑަކީ ފުރަތަމަ ހާފުގެ އިތުރު ވަގުތުގެ ތެރޭގައި ކެނަޑާގެ ކުޅުންތެރިއަކު އަޔަލެންޑުގެ ގޯލު ކުރިމައްޗަށް ހުރަސްކޮށްދިން ބޯޅައެއް ދިފާއުކުރަން އުޅުމުގެ ތެރޭގައި އެޓީމުގެ މިޑްފިލްޑަރު މޭގަން ކޮނޮލީ ފައިގައި ޖެހިފައި ބައިކޮޅަށް ވަން ލަނޑެކެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

ނެޗުގެ ދެވަނަ ހާފުގެ ކެނަޑާއިން އެޓީމުގެ ކުޅުން ރަނގަޅުކޮށް އަޔަލެންޑްގެ ގޯލަށް ގިނަ ހަމަލާތަކެއް ފޮނުވާލާފައިވާ އިރު، މި މެޗުން އެޓީމު މޮޅުވި ލަނޑު ދެވަނަ ހާފުގެ 53 ވަނަ މިނެޓުގައި ކާމިޔާބުކޮށްދިނީ އެޓީމުގެ ފޯވާޑް އެޑްރިއާނާ ލިއޮން އެވެ. މިއީ އެޓީމުގެ މިޑްފިލްޑަރު ސޯފީ ޝްމިޑްޓް ތަނަވަސްކޮށްދިން ފުރުސަތެއްގައި އަޔަލެންޑްގެ ޕެނަލްޓީ އޭރިއާ ތެެރެއިން ބޯޅަ ކޮންޓްރޯލް ކުރުމަށް ފަހު ފޮނުވާލި ބޯޅަ ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މެޗުގެ ފަހުކޮޅު ނަތީޖާ އެއްވަރުކުރުމަށް އަޔަލެންޑްގެ ކޭޓީ މެކެބް ވަނީ ވަރަށް ހުސް ފުރުސަތެއް ލިބި ބޭނުން ނުކުރެވިފައެވެ. ކެނެޑާގެ ދެ ކުޅުންތެރިން ކައިރިން ވަރަށް ރީތިކޮށް ނައްޓާލުމަށް ބޯޅައާއެކު ޕެނަލްޓީ އޭރިއާ ތެރެއަށް ވަދެ ފޮނުވާލި ބާރު ހަމަލާ ދިޔައީ ގޯލުގެ ދަނޑިކައިރިން ބޭރަށެވެ.

މިއާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ކެނަޑާ ކުރީގައި އޮވެގެންނެވެ. 

މި މެޗުން ލިބުނު ތިން ޕޮއިންޓާއެކު އެކު ގްރޫޕް ބީގެ އެއްވަނައިގައި ކުޅުނު ދެ މެޗުން ލިބުނު ހަތަރު ޕޮއިންޓާއެކު އޮތީ ކެނަޑާއެވެ. ދެވަނަ އޮތީ ތިން ޕޮއިންޓާއެކު އޮތް އޮސްޓްރޭލިޔާ އެވެ. މާދަމާ ނައިޖީރިއާ އާއި ދެކޮޅަށް ކުޅޭ މެޗުން އޮސްޓްރޭލިއާ މޮޅުވެއްޖެ ނަމަ އެޓީމަށް މުބާރާތުގެ ދެވަނަ ބުރުގެ ފުރުސަތު ޔަގީންވުމާއެކު، އަޔަލެންޑަށް ދެވަނަ ބުރުގެ ދޮރު ބަންދުވެގެން ދާނެއެވެ.