މިއަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި މޯލްޑިވިއަން ޑިމޮކްރެޓިކް ޕާޓީ (އެމް.ޑީ.ޕީ) އާއެކު ކޯލިޝަން ނުހެދުމަށް މޯލްޑިވްސް ރިފޯމް މޫވްމެންޓް (އެމް.އާރް.އެމް) އިން ނިންމައިފިއެވެ. 

މިކަމާއި ގުޅިގެން އެމްއާރްއެމް އިން ނެރުނު ނޫސްބަޔާނެއްގައި ބުނެފައިވަނީ، ރިޔާސީ އިންތިޚާބުގައި އެމް.ޑީ.ޕީ އާއެކު މަސައްކަތް ކުރުމާމެދު މަޝްވަރާ ކުރުމަށް، އެ ޕާޓީގެ އެންމެ އިސްފަރާތް އަދި ދިވެހި ރާއްޖޭގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، އެމްއާރްއެމްގެ ޒަޢީމް، ރައީސް މައުމޫން ޢަބްދުލްޤައްޔޫމްއަށް ދެއްވި ދަޢުވަތާ ގުޅޭގޮތުން މަޝްވަރާ ކުރުމަށް އެމް.ޑީ.ޕީގެ އިސްވެރިންނާއެކު ބައްދަލުވުމެއް ބޭއްވިފައިވާ ކަމަށެވެ. އަދި މީގެއިތުރުން ނުރަސްމީކޮށް އަދި ލިޔެކިޔުމުގެ ޒަރީޢާއިން ވެސް މަޝްވަރާކުރެވި، އެމް.އާރް.އެމް އިން ތާޢީދުކުރާ ސިޔާސަތުތައް ހާމަކުރެވިފައިވާ ކަމަށް އެ ޕާޓީން ބުނެފައި ވެއެވެ. 

"އެމް.ޑީ.ޕީ ގެ އިސްވެރިންނާއެކެ 1 މެއި 2023 ވަނަ ދުވަހުގެރޭ އެމް.އާރް.އެމް އޮފީހުގައި ބޭއްވުނު ބައްދަލުވުމަށްފަހު، އެމް.ޑީ.ޕީގެ ހުށަހެޅުންތައް މިޕާޓީގެ އެކްސްކޯ އަށް ހުށަހަޅައި މަޝްވަރާކުރުމަށްފަހު، އެމް.ޑީ،ޕީއިން ހުށަހަޅާފައިވާ ބައެއް ސިޔާސަތުތަކަށް އެމް.އާރް.އެމް އަށް އެއްބަސް ނުވެވޭތީ، މިޕާޓީގެ އެގްޒެކެޓިވް ކޮމިޓީގެ މި އަހަރުގެ 10 ވަނަ ބައްދަލުވުމުގައި ނިންމާފައިވަނީ ކުރިއަށް އޮތް ރިޔާސީ އިންތިޚާބުގެ ފުރަތަމަބުރުގައި އެމް.ޑީ.ޕީ އާއި އެކު މަސައްކަތް ކުރަން ނުފެންނަ ކަމަށެވެ." އެމްއާރްއެމްއިން ބުނެފައިވެއެވެ. 

މިއާއެކު އެމްއާރްއެމް އިން ވަނީ މިއަހަރުގެ ރިޔާސީ އިންތިޚާބުގައި އެކުގައި މަސައްކަތް ކުރުމަށް ދެއްވި ދަޢުވަތަށް، ރައީސް އިބްރާހީމް މުޙައްމަދު ޞާލިޙަށާއި، އެމް.ޑީ.ޕީގެ އިސްވެރިންނަށް ޝުކުރު ދަންވާފައެވެ.

ކުރިއަށް އޮތް ރިޔާސީ އިންތިހާބުގައި އެމްޑީޕީއާއި އެކު ކޯލިޝަން ހެދުމުގެ ދައުވަތު، އެމްއާރްއެމްގެ އިތުރުން އަދާލަތު ޕާޓީ އަށާއި، އެމްޑީއޭ އާއި ޖުމްހޫރީ ޕާޓީ އަށް ވަނީ ދީފައެވެ. އެހެންނަމަވެސް އެ ޕާޓީ އާއި ކޯލިޝަން ހަދާފައި ވަނީ އެމްޑީއޭ އާއި އަދާލަތުން އެކަންޏެވެ. 

ޖުމްހޫރީ ޕާޓީ އާއި އެމްއާރްއެމް އިން އެމްޑީޕީީ އާއިއެކު ކޯލިޝަން ނުހަދަން ނިންމާފައިވާއިރު، އެ ދެޕާޓީން މިހާރު އަންނަނީ ރިޔާސީ އިންތިހާބުގައި އެކުގައި މަސައްކަތް ކުރުމަށް މަޝްވަރާ ކުރަމުންނެވެ.