އެކުވެރިކަމުގެ މެޗެއްގައި މިއަދު ސްޕެއިންގެ ރެއާލް މެޑްރިޑާއި ޕްރެމިއާ ލީގުގެ މެންޗެސްޓާ ޔުނައިޓެޑް ވާދަކުރި މެޗު 2-0 ގެ ނަތީޖާއަކުން ރެއާލް މެޑްރިޑް ކާމިޔާބުކޮށްފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ރެއާލް މެޑްރިޑުން ކާމިޔާބުކުރި ފުރަތަަމަ ލަނޑު މެޗު ފެށިގެން ހަ ވަނަ މިނެޓުގައި ކާމިޔާބުކޮށްދިނީ މިދިޔަ ޖޫން ޖަރުމަނުގެ ބޮރޫޝިއާ ޑޯޓްމަންޑް އިން އެޓީމާއި ގުޅުނު އިގިރޭސި މިޑްފީލްޑަރު ބެލިންހަމް އެވެ.

މިއީ އެޓީމު ޖަރުމަނު ޑިފެންޑަރު ރުޑިގާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މެޗުގެ ފުރަތަަމަ ހާފުގައި ދެޓީމުން ވެސް ލަނޑު ޖަހާނެ ރަގަޅު ފުރުސަތުތަކެއް ތަނަވަސްކުރި ނަމަވެސް ފުރަތަަމަ ހާފު ކުޅުން ނިމިގެންދިޔައީ 1-0 ގެ ނަތީޖާއަކުން ރެއާލް މެޑްރިޑް ކުރީގައި އޮވެގެންނެވެ.

Advertisement

މެޗުގެ ދެވަަނަ ހާފު ގިނަ ބަދަލުތަކަކާއި އެކު ރެއާލް މެޑްރިޑުން ފެށިއިރު، މިހާފުގައި ގިނަވަގުތު ބޯޅަ ހިފަހައްޓައިގެން މެޗު ޑޮމިނޭޓުކުރީ މެންޗެސްޓާ ޔުނައިޓެޑް އިންނެވެ. އަދި މި ފަހުގައި މެޗުގެ ނަތީޖާ އެއްވަރުކުރުމަށް އެޓީމަށް ލިބުނު ފުރުސަތުތަކުގެ ބޭނުން ނުކުރެވުނު އިރު، މި މެޗުގައި ރެއާލް މެޑްރިޑުން ކާމިޔާބުކުރި ދެވަނަ ލަނޑު ފަހުހާފުގެ 89 ވަނަ މިނެޓުގައި ކާމިޔާބުކޮށްދިނީ ރެއާލްގެ ތަޖުރިބާކާރު ފޯވާޑް ޖޯސޭލޫ އެވެ. މިއީ އެޓީމުގެ ލޫކަސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މި ލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން ރެއާލް މެޑްރިޑް ކުރީގައި އޮވެގެންނެވެ. މިއީ ކުރިއަށް އޮތް ސީޒަނަށް ތައްޔާރުވުމުގެ ގޮތުން ރެއާލް މެޑްރިޑް ކުޅުނު ދެވަނަ މެޗެވެ. ފުރަތަަމަ މެޗުގައި އެޓީމުން ވަނީ އޭސީ މިލާން ދެ ލަނޑު ކާމިޔާބުކޮށްފައި ވަނިކޮށް ފަހަތުން އަރައި ތިން ލަނޑު ކާމިޔާބުކޮށް 3-2 ގެ ނަތީޖާއަކުން މޮޅުވެފައެވެ.