މާލޭގައި ބޭރަށް ހިންގުން އިންތިހާއަށް އިތުރުވާތީ، ރައްކާތެރި ކަމުގެ ފިޔަވަޅު އެޅުމަށް ރާއްޖޭގެ ފުންނާބު އުސް ކުޑަކުދިންގެ ޚާއްސަ ޑޮކްޓަރު އަބްދުالله ނިޔާފް އިރުޝާދު ދެއްވައިފި އެވެ. 

ޑރ. ނިޔާފް ކުރެއްވި ޓްވީޓެއްގައި ވަނީ، ބޭރަށް ހިންގާތީ ހޮސްޕިޓަލުގެ އެމެޖެންސީ އަށް ދައްކާ ތުއްތު ކުދިންނާއި، ކުޑަ ކުދިންގެ އަދަދު ވަރަށް ބޮޑަށް އިތުރު ވެފައިވާ ކަން ފާހަގަކޮށް އެކަމާއި ކަންބޮޑުވުން ފާޅުކުރައްވާފައެވެ. 

އެހެންކަމުން، އެ ބަލިން ރައްކާތެރިވުމަށް، ތިމާ ބޯ ފެނަކީ، ސާފު ބޯފެންތޯ ޔަގީން ކުރުމަށް ނިޔާފް ވަނީ އިރުޝާދު ދެއްވާފައެވެ. އެގޮތުން، ކެއްކުމަށްފަހު، ފިނި ކޮށްފައި ހުންނަ ފެނާއި، ފިލްޓަރ ކޮށްފައި ހުންނަ ފެނަކީ ރައްކާތެރި ފެން ކަން ޑޮކްޓަރ ފާހަގަކުރެއްވިއެވެ. 

އަދި މީގެ އިތުރުން، އަތް ރަނގަޅަށް ސާފުކޮށް ދޮވުމާއި، ތިމާގެ އަމިއްލަ ހަށިގަނޑުވެސް ސާފުތާހިރު ކަންމަތީ ބެހެއްޓުމަކީ ބަލިން ރައްކާތެރިވުމަށް އެޅިދާނެ ފިޔަވަޅެއް ކަމަށް ޑޮކްޓަރ ނިޔާފް ވިދާޅުވި އެވެ. 

ބޭރަށް ހިންގުމަކީ އޭގެ ޒާތުގައި މާ ސީރިއަސް ބައްޔަކަށް ނުވި ނަމަވެސް، އެކަށީގެންވާ ފަރުވާ ނުދެވިއްޖެނަމަ ނުރައްކާ ހާލަތަކަށް ބަދަލުވެގެންދާ ބައްޔެކެވެ.

ޚާއްސަކޮށް ކުޑަކުދިން ބޭރަށް ހިންގާނަމަ ޑީހައިޑްރޭޓްވެ، ހަށިގަނޑުން ފެން ހުސްވުމުގެ މިންވަރު އަވަސްވެއެވެ. އެހެންކަމުން ކުޑަކުއްޖަކު ބޭރަށް ހިންގާތާ 24 ގަޑިއިރުވާއިރުވެސް ބަލި ރަނގަޅު ނުވެއްޖެނަމަ، ވީ އެންމެ އަވަހަކަށް ޑޮކްޓަރުގެ އެހީ ހޯދުމަށް އެޗްޕީއޭއިން އިލްތިމާސްކުރެއެވެ. 

ހަކުރުނާޅާ، އަލި ކުލައިގެ ބުއިންތައް ބޭނުންކުރުން

ބޮޑުކަމުދާ ކޮންމެ ފަހަރަކު ގިނައިން ދިޔާތަކެތި ބޭނުންކުރުން. (މަދުވެގެން 1 ޖޯޑު)

މައިގަނޑު ކެއުން ކާ ގަޑިތަކުގެ ދެމެދަށް އޮންނަ ގަޑިތަކުގައި ދިޔާތަކެތި ބޭނުންކުރުން

ޕޮޓޭސިއަމްއިން މުއްސަނދިވެފައިވާ ބާވަތްތައް ބޭނުންކުރުން. (މިސާލު: ތޮށި ނޮޅާފައި ހުންނަ އަލުވި، ދޮންކެޔޮ)

ލޮނު އެކުލެވޭ ބުއިންތައް ބޭނުންކުރުން

ކްރީމް ހުންނަ ކާބޯތަކެއްޗާ، ތެލުލި އެއްޗިއްސާ، ހަކުރުއެޅީ ކާބޯތަކެއްޗާ ދުރުވުން

ބަނޑުހަރުކުރަން އެހީވެދޭ ބަތާ، އޯޓްމީލް ފަދަ ކާބޯތަކެތި އިހުތިޔާރު ކުރުން

ޝުގާ-ފްރީ ޖަހާފައި ހުންނަ ޗުއިންގް-ގަމް، ބްރެތްފްރެޝް މިންޓްސް ބޭނުން ނުކުރުން

ކެފޭން ބޭނުންކުރުން މަދުކުރުން

ތުއްތު ދަރިފުޅަށް 6 މަސްވަންދެން ގާތުން ދޭ ކިރު ފިޔަވާ އިތުރު އެއްޗެއް ނުދިނުން