އެމްޑީޕީގެ ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދަށް ވަފާތެރި މެންބަރުން އުފެއްދެވި ދަ ޑިމޮކްރެޓްސްގެ ރިޔާސީ ޕްރައިމަރީއަށް ވޯޓުލާން މިއަދު 2:00 ގައި ފަށާނެ ކަމަށް އެ ޕާޓީން ބުނެފި އެވެ.
ޑިމޮކްރެޓްސް އިން ބުނީ، ރިޔާސީ ޕްރައިމަރީއަށް ވޯޓުލުން ކުރިއަށް ދާނީ މިއަދު މެންދުރު 2:00 އިން ހަވީރު 6:00 އަށް ކަމަށެވެ.
އަދި ޕްރައިމަރީގެ ވޯޓުލުން ކުރިޔަށް ދާއިރު ޕާޓީ އާ ގުޅޭ މެންބަރުންނަށް ވެސް އިންތިހާބުގައި ވޯޓު ލެވޭނެ ކަމަށް އެ ޕާޓީން ބުނެއެވެ.
ޑިމޮކްރެޓްސް އިން ނިންމާފައި ވަނީ ރާއްޖޭގެ އެކި ކަންކޮޅުތަކުގައި ޕްރައިމަރީގެ ވޯޓުލުން ކުރިޔަށް ގެންދާށެވެ. އަދި ޕްރައިމަރީގައި އޮންލައިންކޮށް ވޯޓުލުމުގެ ފުރުސަތު ވެސް އެ ޕާޓީން ވަނީ ހުޅުވާލާފައެވެ.
ރިޔާސީ އިންތިހާބަށް ޑިމޮކްރެޓްސް އިން ކެންޑިޑޭޓެއް ނެރުމަށް އެ ޕާޓީން ވާދަކުރަން ޝައުގުވެރިވާ ފަރާތްތަކަށް ހުޅުވައިލި ފުރުސަތުގައި އެކަމަށް ކުރިމަތި ލެއްވީ ހުޅުދޫ ދާއިރާގެ މެންބަރު އިލްޔާސް ލަބީބް އެކަންޏެވެ.
ޑިމޮކްރެޓްސްގެ އަސާސީ ގަވައިދު ބުނާ ގޮތުން ރިޔާސީ ޕްރައިމަރީ އަށް އެއް ކެންޑިޑޭޓަކު ކުރިމަތިލައިފި ނަމަ މެންބަރުންގެ މެދުގައި ފެންނަ ނުފެންނަ ވޯޓެއް ނަގަން ޖެހޭނެ އެވެ. އަދި މެންބަރުންގެ 10 ޕަސެންޓު ވޯޓު އެ ކެންޑިޑޭޓަކަށް ލިބިއްޖެ ނަމަ އެ މީހަކީ ރިޔާސީ ކެންޑިޑޭޓު ކަމުގައި ކަނޑައަޅަން ޖެހޭނެ ކަމަށް އަސާސީ ގަވައިދުގައި ބުނެފައިވެ އެވެ.
Advertisement
This content is created and paid for by advertisers and does not involve Voice Journalists
