އިސްލާމީ އުންމަތް ބައިބައިވެ، މުޝްރިކުންގެ ކުރިމަތީގައި މުސްލިމުންގެ ބާރު ނެތިގެން ދިޔައީ މުސްލިމުންގެ ހިތުގައި އޮތް އީމާންތެރިކަމާއި، މުސްލިމުންގެ މެދުގައި އޮތް އަޚުވަންތަކަން ގެއްލުމުން ކަމަށް މިއަދުގެ ޚުތުބާގައި ބުނެފިއެވެ. 

"އިސްލާމީ އަޚްވަންތަކަމާއި އެއްބައިވަންތަކަން" މައުލޫއަށް އަލިއަޅުވާލައި މިއަދު ރާއްޖޭގެ އެކި ކަންކޮޅުތަކުގައި އިއްވާފައިވާ ޚުތުބާގައި ބުނ،ީ އިސްލާމް ދީނަކީ އުޚުވަތްތެރިކަމުގެ ދީން ކަމަށެވެ. އަދި އެއްވެސް މީހެއްގެ މައްޗަށް އަނިޔާވެރިވެ އެމީހަކަށް ގެއްލުން ދިނުމަކީ ދީން ހުއްދަ ކުރާ ކަމެއް ނޫން ކަމަށްވެސް ޚުތުބާގައި ބުނެފައިވެއެވެ. 

މިއާއެކު، އިސްލާމީ ތާރީޚުގެ ފަތްފުށްތަކަށް ނަޒަރު ހިންގާލަމުން ޚުތުބާ ގައި ބުނީ، އިސްލާމީ އުއްމަތުގެ ކުރީކޮޅު މުސްލިމުންނަށް ނަސްރަކަށްފަހު ނަސްރެއް ލިބެމުންއައީ، އެބައިމީހުންގެ ހިތުގައި އޮތް އީމާންކަމާއި، އެބައިމީހުންގެ މެދުގައި އޮތް އަޚުވަންތަކަމާއި، އެއްބައިވަންތަ ކަމުގެ ސަބަބުން ކަމަށެވެ.

ޚުތުބާގައި އިތުރަށް ބުނީ މުސްލިމުންގެ މެދުގައި އެއްބައިވަންތަކަމާއި، އަޚުވަންތަކަން ދެމެހެއްޓުމަށް އިސްލާމް ދިން ވަރަށް ބޮޑަށް ބާރު އަޅާ ކަމަށާ، އަދި އެކަމަށް ހުރަސް އަޅާ ކޮންމެ ކަމެއް މި ދީނުގައި މަނާ ކުރައްވާފައިވާ ކަމަށެވެ.

އެގޮތުން އެކަކު އަނެކަކަށް މަލާމާތް ކުރުމާއި ފުރައްސާރަ ކުރުމާއި، ހަޑިހުތުރު ބަހުން މުއާމަލާތް ކުރުން އިސްލާމް ދީނުގައި މަނާ ކުރައްވާފައިވާ ކަމަށް ޚުތުބާގައި ބުނެފައިވެއެވެ. 

އަދި ހަމަ އެހެންމެ، މުސްލިމުންނާއި މެދު މުޖުތަމަޢު ގައި ފެތުރެމުންދާ ޚަބަރުތައް އެއްވެސް ތެދު ދޮގެއް ބެލުމެއްނެތި ގަބޫލު ކުރުމަކީ ނޭނގިތިބެ އަނެކާއަށް ގެއްލުމެއް ދެވޭނެ ކަމެއް ކަމަށާ، އެގޮތަށް އެކަން ވެއްޖެ ނަމަ، އެކަމާއި މެދު އެމީހަކު ހިތާމަ ކުރާނެ ކަމަށް ޚުތުބާގައި ބުންޏެވެ. 

މީގެ އިތުރުން ވެސް ތިމާގެ އަޚާއާއި މެދު އިތުބާރު ނުހިފޭ ވާހަކަ ފެތުރުމާއި، ތިމާގެ އަތާއި ދުލުން އެ އަޚާއަށް އަނިޔާ ކުރުމަކީ ދީނުގައި މަނާ ކަމެއް ކަމުގައި ޚުތުބާގައި ބުނެފައިވެއެވެ. 

ވުމާއި އެ ހުރިހާ ކަމަކުންވެސް ދުރުހެލިވެ ތިބުމަށް ޚުތުބާގައި ވަނީ ނަސޭހަތްތެރިވެފައެވެ. އަދި ތިމާގެ އަމިއްލަ ނަފްސަށް ލިބެންއެދޭ ރަނގަޅު ކަންތައްތައް ތިމާގެ އަޚާއަށް ލިބުމަށް އެދުމަށްވެސް ޚުތުބާގައި ނަސޭހަތްތެރުވެފައިވެއެވެ.