އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް ޖީގައި ރޭ ފަތިހު ސައުތު އެފްރިކާ އާއި ދެކޮޅަށް ކުޅުނު މެޗު އެއްވަރުވެ މުބާރާތުގެ ދެވަނަ ބުރަށް ދިއުމުގެ އަމިއްލަ ބާރު އާޖެންޓީނާއަށް ގެއްލިއްޖެ އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން އާޖެންޓީނާ އިން ކުޅުނު ނަމަވެސް މި ހާފުގައި ލަނޑުޖަހާނެ ރަގަޅު ފުރުސަތުތަކެއް ތަނަވަސްކުރީ ސައުތު އެފްރިކާ އިންނެވެ. އެގޮތުން ފުރަތަމަ ހާފުގެ 30 ވަނަ މިނެޓުގައި އެޓީމުން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ.

މިލަނޑު އެޓީމަށް ކާމިޔާބުކޮށްދިނީ މިޑްފީލްޑަރު ލިންޑާ މޮޓްލްހާލޯ އެވެ. މިއީ އެޓީމުގެ ފޯވާޑް ޓެމްބެއި ކްގެޓްލާނާ މުޅިން ހުސްކޮށްލާފައި ޖައްސާލި ބޯޅައެއް އާޖެންޓީނާގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ސައުތު އެފްރިކާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މި މެޗުގައި ސައުތު އެފްރިކާ އިން ކާމިޔާބުކުރި ދެވަނަ ދެވަނަ ހާފުގެ 66 ވަނަ މިނެޓުގައި ކާމިޔާބުކޮށްދިނީ ފޯވާޑް ޓެމްބެއި ކްގެޓްލާނާ އެވެ. މިއީ މިޑްފީލްޑަރު ޖެމެއިން ސިއަޕޯސެނިއު މުޅިން ހުސްކޮށްލާފައި ޖައްސާލި ބޯޅައެއް އާޖެންޓީނާގެ ގޯލު އޭރިޔާ ތެރޭގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ސައުތު އެފްރިކާ އިން ދެ ލަނޑުގެ ލީޑެއްގައި ވަނިކޮށް އާޖެންޓީނާ އަށް ނަތީޖާގެ ފަރަގު ކުޑަކޮށްދިނީ ދެވަނަ ހާފުގެ 74 ވަނަ މިނެޓުގައި ޑިފެންޑަރު ސޯފިއާ  ބްރައުން އެވެ. މިއީ ސައުތު އެފްރިކާގެ ޕެނަލްޓީ އޭރިއާ ބޭރުން ލިބުނު ފުރުސަތުގައި ފޮނުވާލި ބާރު ހަމަލާއެއް ގޯލުގެ މަތީ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. އަދި އޭގެ ފަސް މިނެޓު ފަހުން އެޓީމުގެ ރޮމީނާ ނުނޭޒް ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްދީފައެވެ.

މިއީ އެޓީމުގެ ޔަމިލާ ރޮޑްރިގޭޒް ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މި ލަނޑާއެކު މެޗުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މި މެޗުން ލިބުނު އެއް ޕޮއިންޓާއެކު މި ދެޓީމަށް ވެސް ދެވަނަ ބުރަށް ދިއުމުގެ އަމިއްލަ ބާރު ވަނީ ގެއްލިފަ އެވެ. މި ގުރޫޕްގެ އެއްވަނައިގައި މިވަގުތު އޮތީ ސްވިޑެން އެވެ. އަދި ދެވަނަގައި އޮތީ އިޓަލީ އެވެ. އަދި މިދެޓީމަށް ވެސް ތިން ޕޮއިންޓް ލިބިފައިވާއިރު، މިދެޓީމުންކުރެ ކޮންމެ ޓީމަކަށް އަދި ބާކީ ދެ މެޗު އެބައޮތެވެ.