އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް ޑީގައި މިއަދު ހަވީރު ކުޅެވުނު މެޗުގައި ވާދަވެރި ކުޅުމަކަށްފަހު 1-0 ގެ ނަތީޖާއަކުން ހައިޓީ އަތުން ޗައިނާ މޮޅުވެއްޖެ އެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މެޗު ޑޮމިނޭޓުކުރީ ޗައިނާ އިންނެވެ. ނަމަވެސް މިހާފުގައި އެޓީމަށް ހައިޓީގެ ގޯލާއި އަމާޒުކޮށް ފޮނުވާލެވުނު އެންމެ ހަމަލާއެކެވެ.

މި މެޗުގައި ޗައިނާއަށް އިތުރު މައްސަލަތަކެއް ކުރިމަތިވީ ފުރަތަަމަ ހާފުގެ 29 ވަނަ މިނެޓުގައި އެޓީމުގެ މިޑްފިލްޑަރު ރުއީ ޒަންގް ހައިޓީގެ ކުޅުންތެރިޔަކަށް ކުރި ނުރައްކާތެރި ފައުލަކާ ގުޅިގެން ރެފްރީ އޭނާއަށް ސީދާ ރަތް ކާޑެއް ދައްކާ ދަނޑުން ފޮނުވާލުމުންނެވެ. މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުތެރިއަކު މަދުކޮށެވެ.

ޗައިނާ އިން އެއްކުޅުތެރިއަކު މަދުކޮށް ކުޅެންފެށި ހިސާބުން ހައިޓީ އިން ކުރިއަށްޖެހި ލަނޑެއްޖެހޭތޯ ވަރަށް މަސައްކަތް ކުރި ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ހައިޓީ އިން މެޗު ޑޮމިނޭޓުކުރި އިރު މިހާފުގައި އެޓީމުން ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް އެޓީމަށް ލިބުނު ފުރުސަތުތަކުގެ ބޭނުން ނުކުރެވުނު އިރު، ފަހު ހާފުގެ 74 ވަނަ މިނެޓުގައި ޗައިނާ އިން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ.

މިއީ ހައިޓީގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއަކު ކުރި ފައުލަކާއި ގުޅިގެން ރެފްރީ ޗައިނާ އަށް ދިން ޕެނަލްޓީއެކެވެ. މި ޕެނަލްޓީ ގޯލުގެ ތެރެއަށް ފޮނުވާލައިގެން ޗައިނާއަށް ލީޑު ހޯދައިދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް މިޑްފިލްޑަރު ޝުއާންގް ވަންގް އެވެ.

މެޗުގެ އިތުރު ވަގުތުގެ ތެރޭގައި ނަތީޖާއެއްވަރު ކުރުމަށް ހައިޓީއަށް ވަނީ ވަރަށް ހުސް ފުރުސަތެއް ލިބި ބޭކާރުވެފައެވެ. ޗައިނާ ގޯލު އޭރިޔާ ތެރެއިން އެޓީމުގެ ކެޕްޓަން އަށް ލިބުނު ހުސް ފުރުސަތުގައި އޭނާ ފޮނުވާލި ބޯޅަ ދިޔައީ ގޯލާއި އަމާޒުނުވެ ދަނޑިކައިރިން ބޭރަށެވެ. މިއާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ޗައިނާ ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ކުޅުނު ދެ މެޗުން ޗައިނާ އަށް ތިން ޕޮއިންޓް ލިބިފައިވާއިރު، އެޓީމު މިވަގުތު އޮތީ ގްރޫޕް ޑީގެ ތިން ވަނައިގައެވެ. ނަމަވެސް ގްރޫޕްގެ ފަހު މެޗުގައި އިންގްލެންޑް އަތުން މޮޅުވެ މުބާރަތުގެ ދެވަަނަ ބުރަށް ދިއުމުގެ ފުރުސަތު އެޓީމަށް އޮތް އިރު، މި މެޗުން ބަލިވި ހައިޓީ އަށް ދެވަނަ ބުރުގެ ފުރުސަތު ލިބެން އޮތީ ފަހުމެޗުގައި ޑެންމާކް އަތުން މޮޅުވެ، އިންގްލެންޑާއި ޗައިނާ ވާދަކުރާ މެޗުން ޗައިނާ ބަލިވެއްޖެ ނަމައެވެ.