ދީނީ ހޭލުންތެރިކަން އާންމުންގެ މެދުގައި އިތުރުކުރުމަށް މަސައްކަތް ކުރާ ސަލަފު ޖަމުއިއްޔާ އުވާލަން ސަރުކާރުން މަސައްކަތް ކުރަމުންދަނީ ސަރުކާރު ކޯލިޝަންގައި ހިމެނޭ އަދާލަތު ޕާޓީއަށްވުރެ މުޖުތަމައުގައި ސަލަފުގެ ބަސް ވިކޭތީކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވިދާޅުވެއްޖެ އެވެ. 

ތާރިގު މިފަދައިން ވިދާޅުވެފައި ވަނީ ސަލަފު ޖަމުއިއްޔާ ހިމެނޭހެން ބައެއް ޖަމުއިއްޔާތައް އުވާލުމަށް ޔޫތު މިނިސްޓްރީން ކުރި އިއުލާނަކާއި ގުޅިގެން ފާޑުވިދާޅުވެ ކުރެއްވި ޓްވީޓެއްގަ އެވެ. 

އެގޮތުން ތާރިގު ވިދާޅުވީ ޖަމިއްޔަތުއް ސަލަފު އުވާލަން އިއުލާނުކުރުމުން އެކަމާއި ހައިރާންވެވަޑައި ނުގަންނަވާ ކަމަށެވެ. 

ސަރުކާރު ހިންގާ މައި ޕާޓީގެ ކޮންޓްރޯލު އޮންނަ ރައްޔިތުންގެ މަޖިލީހުން އެންމެ ފަހުން ޖަމުއިއްޔާތަކާއި ބެހޭ ޤާނޫނަށް ގެނައި ބަދަލަކީ ސަލަފު ޖަމުއިއްޔާއަށް އުވާލުމަށް ޓާގެޓުކޮށްގެން ގެނެވުނު ބަދަލެއްކަމަށް ތާރިގު ވިދާޅުވި އެވެ. 

އޭގެ އިތުރުން އޭނާ ވިދާޅުވީ ސަރުކާރުން ސަލަފު ޖަމުއިއްޔާ އުވާލުމަށް މަސައްކަތް ކުރާ ހަމައެކަނި ސަބަބަކީ ސަރުކާރު ކޯލިޝަންގައި ހިމެނޭ އަދާލަތު ޕާޓީއަށް ވުރެ މުޖުތަމައުގައި ސަލަފު ޖަމުއިއްޔާގެ ބަސް ވިކޭތީ ކަމަށާއި، އެމީހުންގެ ނުފޫޒު ގަދަވުމުން ކަމަށެވެ. 

މި އަހަރުގެ ނިޔަލަށް ވިދިވިދިގެން ދެ އަހަރުގެ އަހަރީ ރިޕޯޓް ހުށަހަޅާފައި ނުވާ، ނުވަތަ ހިންގާ ކޮމެޓީ ރަޖިސްޓްރީކޮށްފައި ނުވާތީ 1989 ޖަމިއްޔާއެއް އުވާލަން ޔޫތު މިނިސްޓްރީން އިއްޔެ އިއުލާންކުރި އެވެ. އޭގެ ތެރޭގައި ސަލަފު ޖަމިއްޔާ އޮތީ ހިމެނިފަ އެވެ.

އެކަމަކު ސަލަފުން ބުނި ގޮތުގައި މިދިޔަ އަހަރުގެ މެއި މަހު އެންމެ ފަހުން ޔޫތު މިނިސްޓްރީގައި ރަޖިސްޓްރީކޮށްފައިވާ އެ ޖަމިއްޔާގެ ހިންގާ ކޮމިޓީގެ މުއްދަތު ހަމަވަނީ މެއި 31، 2024 އަށެވެ. އަދި ފާއިތުވި ދެ އަހަރުގެ ތެރޭގައި ހުށަހަޅަންޖެހޭ އަހަރީ ރިޕޯޓު ވެސް ހުށަހަޅާފައިވާ ކަމަށެވެ.

ބައެއް ޖަމުއިއްޔާތައް އުވާލުމަށް ޔޫތު މިނިސްޓްރީން އިއުލާނުކުރި ނަމަވެސް، ފަހުން ވަނީ އެ އިއުލާނު ބާތިލުކޮށްފަ އެވެ.