ދީނާއި ޚިލާފު ވާހަކަ ދެއްކުން ސިޔާސީ މުނިފޫހިފިލުވުމަކަށް ނުހެދުމަށް ޝައިޚް ހަސަން މޫސާ ފިކުރީ އެދިވަޑައިގެންފި އެވެ.

ޝައިޚް ފިކުރީ މިހެން ވިދާލުވެފައިވަނީ ޝައިޚް ކުރެއްވެވި ޓްވީޓެއްގައެވެ.

ޝައިޚް ވަނީ ދީނާއި ޚިލާފު ވާހަކަދައްކައި، ޖުވާ ކުޅުމާއި، މެރުއާނާ ހުއްދަކުރަން ގޮވާލައި ދައްކާ ވާހަކަތަކަކީ ސިޔާސީ މުނިފޫހި ފިލުވުމަކަށް ނުހެދުމަށް އެދިވަޑައިގެންފަ އެވެ. 

Advertisement

މީގެ އިތުރުން އެފަދަ ވާހަކަތައް މީޑިއާގައި ހިއްސާކޮށް ލައިކް ދީ ނުހެދުމަށްވެސް ޝެއިޚް ފިކުރީ ވިދާޅުވެފައިވެއެވެ.

ޝައިޚް މިހެން ވިދާޅުވެފައި މިވަނީ މަސްތުވާތަކެތީގެ ބާވަތެއްކަމުގައިވާ މެޑިކަލް މެރުއާނާ ރާއްޖޭގައި ހުއްދަކުރެވޭނީ ދެވަނަ ދައުރަކަށް ރައީސް އިބްރާހީމް މުޙައްމަދު ޞާލިޙު ރާއްޖޭގެ ވެރިކަމަށް ވަޑައިގެންކަމަށް ކާށިދޫ ދާއިރާގެ މަޖިލިސް މެންބަރު ޢަބްދުالله ޖާބިރު ވިދާޅުވެފައިވާ ދަނޑިވަޅެއްގައެވެ.

ސީއެންއެމްގެ ޕްރޮގުރާމެއްގައި ބައިވެރިވެވަޑައިގެން ރައީސް ސޯލިހަށް ދެވަނަ ދައުރަކަށް ރާއްޖޭގެ ވެރިކަމަށް ގެންނަންވީ ސަބަބުތަކުގެ މައްޗަށް އަލިއަޅުވައިލައްވައި ޖާބިރު ވަނީ ހުރިހާ ޒުވާނުންވެސް ކުރިއަށް އޮތް ރިޔާސީ އިންތިޚާބުގައި ރައީސް ސޯލިހަށް ވޯޓުދޭނެ ކަމަށް ވިދާޅުވެފައެވެ. އަދި ވޯޓު ދޭނެ ސަބަބުތަކުގެ ގޮތުގައި މަރުއާނާއާއި ޖުވާކުޅުން ހުއްދަކުރެއްވުން ހިމެނޭ ކަމުގައިވެސް ޖާބިރު ވިދާޅުވިއެވެ.

"އެ ދެން ގޭމިން އެންޓަޓެއިންމެންޓު އެކަހަލަ އެއްޗެހިވެސް ހުއްދަވާނެ. އަދި މެޑިކަލް މެރުއާނާ އުސޫލެއްގެ ދަށުން ރާއްޖޭގައި ހުއްދަވެގެންދާނެ، ޤާނޫނުތައް ބަދަލުވެގެންދާނެ. މިހުރިހާ ކަމެއް ކުރެވޭނީ މިވަރުގެ ރައީސެއް އައިސްގެންތާ. އެނޫން ގޮތަކަށް މިކަމެއް ނުހިނގާނެ އިނގޭތޯ،" ޖާބިރު ވިދާޅުވިއެވެ.