އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް ޖީގައި މިއަދު މެންދުރު އިޓަލީ އާއި ސްވިޑެން ވާދަކުރި މެޗު 5-0 ގެ ނަތީޖާއަކުން ސްވިޑެން އިން ކާމިޔާބުކޮށްފިއެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން އިޓަލީ އިން ކުޅުނު ނަމަވެސް، މިހާފުގެ ފަހު ހަ މިނެޓް ތެރޭގައި ސްވިޑެން އިން ވަނީ ތިން ލަނޑުގެ ކާމިޔާބުކޮށްފައެވެ.

އެގޮތުން އެޓީމުގެ ފުރަތަަމަ ފުރަތަމަ ހާފުގެ 39 ވަނަ މިނެޓުގައި ކާމިޔާބުކޮށްދިނީ އެޓީމުގެ ޕީއެސްޖީ ޑިފެންޑަރު އަމަންޑާއެވެ. މިއީ އެޓީމަށް ލިބުނު ކޯނަރަކުން ޑިފެންޑަރު ޖޯނާ އެންޑަސަން ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

Advertisement

އެޓީމުގެ ދެވަނަ ލަނޑު ފުރަތަމަ ހާފުގެ 44 ވަނަ މިނެޓުގައި ކާމިޔާބުކޮށްދިނީ ބާސެލޯނާގެ ފޯވާޑް ފްރްޑޯލީނާ ރޯލްފޯ އެވެ. މިއީ ވެސް އެޓީމަށް ލިބުނު ކޯނަރެއްގައި ޖޯނާ އެންޑަސަން ގޯލު ކުރިމައްޗަށް ހުރަސްކޮށްދިން ބޯޅައެއް ދިފާއުކުރަން އުޅުމުގެ ތެރޭގައި އިޓަލީގެ ކީއްޕަރު އަތުގައި ޖެހިފައި ނުކުތް ބޯޅަ ގޯލުއޭރިއާ މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުގައި ސްވިޑެން އިން ކާމިޔާބުކުރި ތިންވަނަ ލަނޑު ފުރަތަމަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ އާސެނަލް ފޯވާޑް ސްޓީނާ ބްލެކްސްޓެނިއަސް އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން ސްވިޑެން ކުރީގައި އޮވެގެންނެވެ.

މެޗުގެ ދެވަަނަ ހާފު ފެށިގެން ފަސް ވަނަ މިނެޓުގައި ސްވިޑެންގެ ހަތަރުވަނަ ލަނޑު ކާމިޔާބުކޮށްދިނީ އަމަންޑާއެވެ. މިއީ އެޓީމަށް ލިބުނު ކޯނަރެއްގައި ޖޯނާ އެންޑަސަން ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުގައި ސްވިޑެން އިން ކާމިޔާބުކުރި ފަސްވަނަ ލަނޑު ދެވަނަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް ފޯވާޑް ރެބެކާ ބްލޮމްކްވިސްޓް އެވެ. މިއީ އެޓީމުގެ ފޯވާޑް ސޯފިއާ ޖަކޮބްސަން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 5-0 ގެ ނަތީޖާއަކުން ސްވިޑެން ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ކުޅުނު ދެ މެޗުން ހަ ޕޮއިންޓް ހަމަކޮށް ސްވިޑެން އިން ވަނީ މުބާރާތުގެ ދެވަނަ ބުރުގެ ޖާގައެއް ކަށަވަރުކޮށްފައެވެ. މި ގްރޫޕްގެ ދެވަނައިގައި އިޓަލީ އޮތްއިރު ގްރޫޕްގެ ފަހު މެޗުގައި ސައުތު އެފްރިކާ އަތުން މޮޅުވެ މުބާރާތުގެ ދެވަނަ ބުރުގެ ޖާގައެއް ހޯދުމުގެ ފުރުސަތު އެޓީމަށް އަދިވެސް އެބައޮތެވެ.