ދިވެހި ޕްރެމިއާ ލީގުގައި މިއަދުގެ ހަވީރު ކުޅުމަށް ހަމަޖެހިފައި އޮތް މެޗަށް ކްލަބް ވެލެންސިއާގެ ކުޅުންތެރިން ހަމަނުވުމުން، 2-0 ގެ ނަތީޖާއަކުން މާޒިޔާ މޮޅުވިކަމަށް ނިންމައިފިއެވެ.
ލީގުގައި މިއަދު މާޒިޔާ އާ ދެކޮޅަށް ކުޅެން އޮތް މެޗަށް ވެލެންސިއާގެ ކޯޗުންނާއި އޮފިޝަލުން އަދި ބައެއް ކުޅުންތެރިން ވެސް ގައުމީ ފުޓްބޯޅަ ދަނޑަށް ހާޒިރުވި އެވެ. ނަމަވެސް މެޗު ކުޅެވޭ ވަރަށް އެ ޓީމުގެ ކުޅުންތެރިން ހަމައެއް ނުވި އެވެ.
އޭގެ ފަހުން އެ ކްލަބުން ނެރުނު ބަޔާނުގައި ބުނީ އެހެން ދިމާވީ މާލޭގައި މިހާރު ފެތުރެމުންދާ ހުމުގެ ރޯގާ ޖެހި އެ ކްލަބްގެ ގިނަ ކުޅުންތެރިން ހުން އައިސް ހޮޑުލައި ބޭރަށްހިންގާތީ ކަމަށެވެ.
"ދިވެހި ޕްރިމިއާ ލީގުގައި މިއަދު ކުޅެން އޮތް މެޗަށް މި ކްލަބްގެ އޮފިޝަލުންނާއި ހާޒިރުވެވެން ތިބި ކުޅުންތެރިން ވަނީ ދަނޑަށް ހާޒިރުވާން އޮންނަ ގަޑިއަށް ދަނޑަށް ދިއުމަށްފަހު އެކަން މުބާރާތް ހިންގާ ފަރާތްތަކަށް ރިޕޯޓްކޮށްފަ އެވެ. ނަމަވެސް މެޗެއް ފުރިހަމަކުރުމަށް ބޭނުންވާ އެންމެ އަސާސީ މިންވަރުކަމަށްވާ 11 ކުޅުންތެރިން މިއަދުގެ މެޗަށް ހަމަކުރެވޭ ގޮތް ނުވީ އެވެ." ހުމުގެ ރޯގާގެ އަސަރުކޮށްގެން ކުޅުންތެރިން ބަލިވެ އުޅޭކަން ހާމަކުރުމުގެ ގޮތުން ވެލެންސިއާއިން ނެރުނު ބަޔާނުގައި ވެއެވެ.
ގިނަ ކުޅުންތެރިން ބަލިވެ އުޅޭތީ މެޗު އެހެން ތާރީހަކަށް ފަސްކޮށް ދިނުމަށް އެ ކްލަބުން އެދުނު ކަމަށް ވެސް ވެލެންސިއާގެ ބަޔާނުގައި ބުނެފައި ވެއެވެ.
މެޗުން މާޒިޔާ މޮޅުވި ކަމަށް ނިންމިކަން ހާމަކޮށް އެފްއޭއެމްގެ ޖެނަރަލް ސެކްރެޓަރީ ހުސައިން ޖަވާޒު، އެ އެސޯސިއޭޝަންގެ މީޑިއާ ގުރޫޕަށް ފޮނުވި މެސެޖުގައި ވިދާޅުވީ ކުޅުންތެރިން ބަލިވެ އުޅޭތީ މެޗު ފަސްކޮށް ދިނުމަށް މެޗަށް ވަގުތުކުޑަތަން ވެފައި ވަނިކޮށް ވެލެންސިއާއިން އެދުނު ކަމަށެވެ. ނަމަވެސް އެހާ ވަގުތުކުޑަތަން ވެފައިވަނިކޮށް އެހެން އެންގި ނަމަވެސް މުބާރާތުގެ ގަވާއިދަށް ރިއާޔަތްކޮށް ވެލެންސިއާ މެޗުން ބަލިވީ ކަމަށް މުބާރާތުގެ ކޮމިޓީން ނިންމާފައިވާ ކަމަށް ޖަވާޒު ވިދާޅުވި އެވެ.
ލީގުގައި މިރޭ، ގްރީން ސްޓްރީޓްސްއާ ދެކޮޅަށް ނުކުންނަ އީގަލްސްގެ ޓީމަށް ވެސް ހުމުގެ ރޯގާގެ އަސަރުކޮށްފައިވާ ކަމަށް އެ ޓީމުގެ ކޯޗު މުހައްމަދު ޝިޔާޒު (މޯހަން) އިއްޔެ ބޭއްވި ޕްރީ މެޗު ޕްރެސް ކޮންފަރެންސްގައި ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
