އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ އެފްގައި މިއަދު ހަވީރު ކުޅެވުނު މެޗުގައި 2-1 ގެ ނަތީޖާއަކުން ބްރެޒިލް ބަލިކޮށް، ފުރަންސް އިން ދެވަނަ ބުރުގެ ފުރުސަތު ބޮޑުކޮށްފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަަމަ ހާފުގައި ދެޓީމުން ވެސް ލަނޑު ޖަހާނެ ރަގަޅު ފުރުސަތުތަކެއް ތަނަވަސްކުރި އިރު، މި މެޗުގައި ފުރަތަަމަ ލަނޑުޖަހައި ކުރިހޯދީ ފްރާންސް އިންނެވެ. މިލަނޑު ފުރަތަމަ ހާފުގެ 17ވަނަ މިނެޓުގައި ކާމިޔާބުކޮށްދިނީ އެޓީމުގެ ފޯވާޑް ޔޫޖެނީ ލެ ސޯމަރ އެވެ.

މިއީ އެޓީމުގެ ޕީއެސްޖީ ފޯވާޑް ކަޑިޑިއަޓޫ ޑިއާނީ ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ފްރާންސް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ބްރެޒިލް އިން އެޓިމުގެ ކުޅުން ރަގަޅުކޮށް އެޓޭކުތައް ވަރުގަދަކުރިއިރު، އެޓީމުން މެޗުގެ ނަތީޖާ އެއްވަރުކުރީ ދެވަނަ ހާފުގެ 58 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ މިޑްފީލްޑަރު ޑެބިންހާ އެވެ. މިއީ ފްރާންސްގެ ގޯލު އޭރިޔާ ތެރެއިން މުޅިން ހުސްކޮށް ހުރެ ލިބުނު ފުރުސަތެއްގައި ވަރަށް ހަމަޖެހިލާފައި ގޯލުގެ ތެރެއަށް ބޯޅަ ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުން ފުރާންސް މޮޅުވި ލަނޑު ފަހުހާފުގެ 83 ވަނަ މިނެޓުގައި ކާމިޔާބުކޮށްދިނީ ލިއޯންގެ ޑިފެންޑަރު ވެންޑީ ރެނާޑް އެވެ. މިއީ އެޓީމަށް ލިބުނު ކޯނަރެއްގައި ޑިފެންޑަރު ސެލްމާ ބާޗާ ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ފްރާންސް ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ކުޅުނު ދެ މެޗުން އެޓީމަށް ހަތަރު ޕޮއިންޓް ލިބިފައިވާއިރު، ގްރޫޕް އެފްގެ އެއްވަނައިގައި މިވަގުތު އޮތީ އެޓީމެވެ. މި މެޗުން ބަލިވި ބްރެޒިލް ދެމެޗު ކުޅެފައިވާއިރު އެޓީމަށް ލިބިފައިވަނީ ތިން ޕޮއިންޓެވެ.