އެމްޑަބްލިއުއެސްސީ ދިވެހި ޕްރެމިއާ ލީގުގައި މިރޭ 6-1 ގެ ނަތީޖާއަކުން ގްރީން ސްޓްރީޓް ބަލިކޮށް ކުލަބު އީގަލްސް އިން ލީގުގެ އެއްވަނައިގައި އޮތް މާޒިޔާ އާއި ދެމެދު އޮތް ފަރަގު ދެ ޕޮއިންޓަށް ކުޑަކޮށްފިއެވެ.

މިނިވަން ދުވަހުގެ ކުޅިވަރު ހަރަކާތްތަކަށް ގަލޮޅު ރަސްމީ ދަނޑުގައި ކުރިއަށް ގެންދިއުމަށް ލީގުގެ ކުޅުން މެދުކަނޑާލުމަށް ފަހު ލީގުގެ ކުޅުން އަލުން މިއަދު ފެށިއިރު، މިރޭގެ މެޗުގެ ފުރަތަަމަ ހާފުގައި ކުލަބު އީގަލްސް ފެނުނީ މާބޮޑަށްވެސް ވަރުގަދަކޮށެވެ.

އެގޮތުން މެޗުގެ ފުރަތަަމަ ހާފުގައި އެޓީމުން ހަތަރު ލަނޑުގެ ލީޑެއް ނެގިއިރު، އެޓިމުގެ ފުރަތަަމަ ލަނޑު މެޗުގެ 12 ވަނަ މިނެޓުގައި ކާމިޔާބުކޮށްދިނީ ބްރެޒިލްގެ ފޯވާޑް އިވާން އެވެ. އަދި އޭގެ ތިން މިނެޓު ފަހުން އެޓީމުގެ މިޑްފިލްޑަރު އިސްމާއިލް އީސާ ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

Advertisement

ފުރަތަަމަ ހާފުގައި އީގަލްސް އިން ކާމިޔާބުކުރި ތިންވަނަ ލަނޑު އިބްރާހިމް މަހުދީ 37 ވަނަ މިނެޓުގައި ކާމިޔާބުކޮށްދިންއިރު، އެޓީމުގެ ހަތަރުވަނަ ލަނޑު ފުރަތަމަ ހާފުގެ 43 ވަނަ މިނެޓުގައި ކާމިޔާބުކޮށްދިނީ ކެޕްޓަން އަހުމަދު ރިޒްވާން އެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 4-0 ގެ ނަތީޖާއަކުން ކުލަބު އީގަލްސް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ކުލަބު އީގަލްސް އިން ގިނަވަގުތު ބޯޅަ ހިފަހައްޓައިގެން މެޗު ޑޮމިނޭޓުކުރި އިރު، މި މެޗުގައި އެޓީމުން ކާމިޔާބުކުރި ފަސްވަނަ ލަނޑު ދެވަނަ ހާފުގެ 66 ވަނަ މިނެޓުގައި ކާމިޔާބުކޮށްދިނީ ބްރެޒިލްގެ ފޯވާޑް އިވާން އެވެ. އަދި އޭގެ ތިން މިނެޓު ފަހުން އެޓީމުގެ ހަވަނަ ކާމިޔާބުކޮށްދިނީ މި މެޗުގައި މޮޅު ކުޅުމެއް ދެއްކި އިބުރާހިމް މަހުދީ އެވެ.

މި މެޗުގައި ގްރީން ސްޓްރީޓް އިން ކާމިޔާބުކުރި ހަމައެކަނި ލަނޑު ދެވަނަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ އިބްރާހިމް ހާމިދުއެވެ. މި ލަނޑާއެކު މެޗުގެ ކުޅުން ނިމިގެންދިޔައީ 6-1 ގެ ނަތީޖާއަކުން ކުލަބު އީގަލްސް ކުރީގައި އޮވެގެންނެވެ.

މި މެޗުގެ މޭން އޮފް ދަ މެޗަކަށް ހޮވުނީ ކުލަބް އީގަލްސްގެ އިބްރާހިމް މަހުދީ އެވެ.

މި މެޗުން ލިބުނު ތިން ޕޮއިންޓާއެކު ކުލަބު އީގަލްސް ކުޅުނު ހަ މެޗުން އެޓީމަށް 16 ޕޮއިންޓް ލިބިފައިވާއިރު، މި ވަގުތު އެޓީމު އޮތީ ލީގު ތާވަލްގެ ދެވަނައިގައެވެ. އެއްވަނައިގައި އޮތީ ހަ މެޗުން 18 ޕޮއިންޓް ހޯދާފައިވާ މާޒިޔާ އެވެ. އަދި މި މެޗުން ބަލިވި ގްރީން ސްޓްރީޓް ކުޅުނު ހަ މެޗުން ލިބުނު ތިން ޕޮއިންޓާއެކު މިވަގުތު އޮތީ ލީގު ތާވަލްގެ 7 ވަނައިގައެވެ.