ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ހަކުރު ވިއްކަން ތާއިދު ކުރައްވާ ކަމަށާއި، އެއީ ބަލައިގަނެވޭނެ ކަމެއް ނޫން ކަމަށް ރައްޔިތުންގެ މަޖީލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ޑިމޮކްރެޓްސް ގެ ރިޔާސީ ކެންޑިޑޭޓް ހުޅުދޫ ދާއިރާގެ މެންބަރު އިލްޔާސް ލަބީބްގެ ކެންޕެއިނަށް އައްޑޫއަށް ވަޑައިގެން ފޭދޫ ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުން ނަޝީދު ވިދާޅުވީ، ރާއްޖޭގައި މަސްތުވާތަކެތި ބޭނުން ކުރާ މީހުން މިހާރު ވަރަށް ގިނަވެފައިވާ ކަމަށެވެ. އެހެންކަމުން މަސްތުވާތަކެތީގެ ފަސް ގްރާމް ގެންގުޅޭ މީހުންނަށް އަޅާލެވެންވެސް މިހާރު ނެތް ކަމަށާއި، ޓްރެފިކް ކުރާ މީހުންނަށް އަދި އަމުދުން އަޅާ ލެވެން ނެތް ކަމަށެވެ.
"އަޅުގަނޑުމެންނަށް ވަރަށް އުނދަގޫ ތަނެއްގައި މިހާރު މި ތިބެވެނީ. އަދި ހައްދުފަހަނައަޅާފައިވާ އެކިއެކި ޖަމާއަތްތަކުން ފައިސާ ރެއިސް ކުރުމަށް، ހޯދުމަށް ހިންގާ އެންމެ ބޮޑު އެއް ވިޔަފާރިއަކީ މަސްތުވާތަކެތީގެ ވިޔަފާރި" ނަޝީދު ވިދާޅުވިއެވެ.
ނަޝީދު ވިދާޅުވީ މަސްތުވާތަކެތި ބޮޑިކޮށް "ލައްވަމުން" ދާ ދިއުން އާއްމު ކަމަކަށްވެސް ވެފައިވާ ކަމަށެވެ.
"އަޅުގަނޑުމެންގެ ހިތަކަށް ނުވެސް ގެވޭނެ އެ ދެވީގައި ހުންނަ ކުއްޖެއް އެކަމެއް ވީމަ މުޅި އާއިލާއަށް އެ ވަމުންދާ ގޮތް، އެ ކުއްޖާއަށް ވަކި ދެރަ ގޮތެއްވާކަން ބޭނުމެއް ނޫން. ދެން އެހެން ނަމަވެސް ގޭގައި އެބަތިވި އެހެން ކުދިންވެސް، އެ ކުދިންގެ ދިރިއުޅުންވެސް ހަލާކުވާކަށް ނޭދޭ".
ރައީސް މުހައްމަދު ނަޝީދު
މަސްތުވާތަކެތީގެ މައްސަލައަށްވުރެ ވަކި ބޮޑު ކަމެއް ނެތް ކަމަށާއި، ރާއްޖޭގެ ވަރަށް ގިނަބަޔަކު އެ ވަބާގައި ޖެހިފައިވާ ކަމަށް ނަޝީދު ވިދާޅުވިއެވެ.
މިއާއެކު ނަޝީދު ވަނީ ކާށިދޫ ދާއިރާގެ މެންބަރު އަބްދުالله ޖާބިރު، ރައީސް އިބްރާހިމް މުހައްމަދު ސޯލިހުގެ ވެރިކަމެއްގައި މެޑިކަލް މެރުއާނާ ރާއްޖެ އެތެރެކުރުން ފަސޭހަ ވާނެ ކަމަށް ވިދާޅުވި ވިދާޅުވުމަށް އަލި އަޅުވާލައްވައި، އެކަމާއި ނުރުހުން ފާޅުކުރައްވާފައެވެ. ނަޝީދު ވިދާޅުވީ އެއީ މަޖަލަކަށް ނަމަވެސް ދައްކަން ހެޔޮވާ ވަރުގެ ކަމެއް ނޫން ކަމަށެވެ.
"އަޅުގަނޑަކަށް ނުފެނޭ މަޖަލަށް ހަދާފައިވެސް މި ބާވަތުގެ ވާހަކަ ދައްކަން، ރައީސް ސޯލިހްވެސް އަތް ޖައްސަންވަންށޭ މި އިންނަނަވަނީ. އެއިކީ މަޖާ ކަމެއް ނޫން، ޖާބިރު އަބަދު ދައްކަވާ ވާހަކަތައްވެސް މަޖަލެއްވެސް ނޫން".
ރައީސް މުހައްމަދު ނަޝީދު
ރައީސް ނަޝީދު ވިދާޅުވީ ޖާބިރުގެ އެ ވާހަކައިގެ ސަބަބުން ރައްޔިތުންގެ ތެރޭގައި ވަރަށް ބޮޑެތި އޮޅުން އަރާ ކަމަށެވެ. އަދި ރައީސް ޞާލިހު އެކަމަށް ތާއީދު ކުރެއްވުމަކީ ބަލައިގަނެވޭނެ ކަމެއް ނޫން ކަމަށްވެސް ނަޝީދު ވިދާޅުވި އެވެ.
"ރައީސުލްޖުމްހޫރިއްޔާ އެކަމަށް ތާއިދު ކުރައްވައިގެން އިންނަވާކަން، އެއީ ހަކުރު ވިއްކަން ތާއިދު ކުރައްވައިގެން އިންނަވާކަން، އެއީކީ ބަލައިގަނެވޭނެ ކަމެއް ނޫން."
ރައީސް މުހައްމަދު ނަޝީދު
ނަޝީދު ވިދާޅުވީ، ރާއްޖޭގެ ޒުވާނުން މަސްތުވާތަކެތީގެ ވަބާއިން ސަލާމަތް ކުރެވޭނެ ގޮތްވެސް ހޯދަން ޖެހޭ ކަމަށެވެ. އަދި މައިންބަފައިންނަށް އެހެން ކުދިންނާއި އެކީގައި ދިރިއުޅެވޭނެ ގޮތްވެސް ހޯދަން ޖެހޭ ކަމަށެވެ.
"އެއް ކުއްޖަކު ގޮސްވެގެން ދިޔައީމަ ދައުލަތުން އެބަ ޖެހޭ އެކަންތައް ބަލަހައްޓައިދޭން، އަޅުގަނޑު ދެކޭ ގޮތުގައި ތިއި ކޮންމެހެންސް އަޅާލަން ޖެހޭ ކަމެއް، ތަރައްގީ ނުވެގެން މި އުޅެނީ ބްރިޖެއް ނޫން، ގޭތެރެ، އަމިއްލަ ގޭތެރެ، އަޅުގަނޑުމެން ހާސްކަމެއްގައި މި ތިބެނީ ގޭތެރޭގެ ކަންތައްތަކާއި ހުރެ.". ނަޝީދު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
