އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް އެޗްގައި މިއަދުގެ މޮރޮކޯ އާއި ސައުތު ކޮރެއާ ވާދަކުރި މެޗު 1-0 ގެ ނަތީޖާއަކުން ކާމިޔާބުކޮށް މޮރޮކޯ އިން ތާރީޚީ މޮޅެއް ހޯދައިފި އެވެ.

މުބާރާތުގައި މުޅިން އަލަށް ވާދަކުރަމުން އަންނަ މޮރޮކޯ އިން ފުރަތަ މެޗުގައި 6-0 ގެ ތަފާތުބޮޑު ނަތީޖާއަކުން ޖަރުމަނު އަތުން ބަލިވެފައި އޮތުމުން، މުބާރާތުގައި އިތުރަށް ކުރިއަށް ދިއުމަށްޓަކައި މި މެޗުން މޮޅުވުމުން އެޓީމަށް އޮތީ މަޖުބޫރުވެފައެވެ.

ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ވަރަށް ކުރީކޮޅު މޮރޮކޯ އިން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މި ލަނޑު ފުރަތަމަ ހާފުގެ ފެށިގެން ހަވަނަ މިނެޓުގައި ކާމިޔާބުކޮށްދިނީ އެޓީމުގެ ފޯވާޑް އިބްތިސާމް ޖުރައިދީ އެވެ. މިއީ އެޓީމުގެ ޑިފެންޑަރު ހަނާނޭ އައިޓް އަލް ހާޖީ އަރިމަތިން ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

Advertisement

މޮރޮކޯގެ ލަނޑަށްފަހު ފުރަތަަމަ ހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން މޮރޮކޯ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިހާފުގައި ވެސް ކޮރެއާއަށް ދިމާވި އެންމެ ބޮޑު މައްސަލައަކީ އެޓީމަށް ލިބުނު ފުރުސަތުތަކުގައި ފޮނުވާލި އެއްވެސް ހަމައެއް މޮރޮކޯ ގޯލާއި އަމާޒުކޮށްލެވޭ ގޮތް ނުވުމެވެ. މިއާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން މޮރޮކޯ ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ކުޅުނު ދެ މެޗުން މޮރޮކޯއަށް ތިން ޕޮއިންޓް ލިބިފައިވާއިރު، މި މެޗުން ބަލިވި ކޮރެއާ ކުޅުނު ދެ މެޗުން ވެސް ބަލިވެ މުބާރާތުގައި ކުރިއަށް ދިއުމުގެ ފުރުސަތު ވަނީ ވަރަށް ބޮޑަށް ހަނިވެފައެވެ.