އިއްޔެގެ ނިޔަލަށް ރިޔާސީ އިންތިޚާބުގައި ވޯޓުލުމަށް ރީ ރެޖިސްޓަރ ކުރުމަށް ފޯމު ހުށައަޅައިފައިވަނީ 11933 ފޯމު ކަމަށް އިލެކްޝަންސް ކޮމިޝަންގެ ނައިބުރައީސް އިސްމާއިލް ޙަބީބް ވިދާޅުވެއްޖެއެވެ.
ޙަބީބު ކުރެއްވެވި ޓްވީޓެއްގައި ވިދާޅުވެފައިވަނީ 2023 ޖުލައި 29 ގެ ނިޔަލަށް ރީ- ރަޖިސްޓްރީ ކުރަން ހުށަހެޅީ 11933 ފޯމުކަމަށެވެ. އަދި އޭގެ ތެރެއިން 8624 ފޯމު ލިބިފައިވަނީ އޮންލައިން ކޮށްކަމަސްވެސް ޙަބީބް ވިދާޅުވެފައިވެއެވެ.
މީގެއިތުރުން ޙަބީބު ވިދާޅުވީ ރާއްޖޭން ބޭރުގައި ވޯޓުފޮށި ބެހެއްޓޭކަން މިހާތަނަށް ކަށަވަރުވެފައިވަނީ، މެލޭޝިޔާ އާއި އިނގިރޭސި ވިލާތުގައި އެކަނި ކަމަށެވެ. އަދި އެހެން ޤައުމުތަކުގައި ވޯޓުފޮށި ބެހެއްޓޭވަރަށް ވޯޓުލާ މީހުން ރަޖިސްޓަރީ ވެފައިނުވާ ކަމަށްވެސް ޙަބީބު ވިދާޅުވެފައިވެއެވެ.
"ވީހާ ވެސް އަވަހަކަށް ރީ-ރަޖިސްޓްރީ ކުރައްވައި ނިންމެވުމަކީ ވަރަށް މުހިންމުކަމެއް، އަދި މިހާރު ރީ- ރަޖިސްޓަރީ ވެފައިވާ ފަރާތްތަކުގެ މަޢުލޫމާތު އީސީގެ ވެބްސައިޓުގައި ހާމަކުރުމުގެ އިތުރުން ސިޔާސީ ޕާޓީތަކާ ވެސް ޙިއްސާ ކުރެވެމުން އެބަގެންދެވޭ، އެންމެފަހު ވަގުތަށް ނުތިއްބަވާ" ޙަބީބް ވިދާޅުވެފައިވެއެވެ.
އީސީ އިން ނިންމާފައިވަނީ ރާއްޖެ އާއި ރާއްޖޭން ބޭރުގައި ޖުމްލަ 604 ވޯޓުފޮށި ބަހައްޓާގޮތަށެވެ. ރީރެޖިސްޓޭޝަނަށްފަހު ފޮށީގެ ޢަދަދަށް ބަދަލު އައިސްފާނެ ކަމަށް ޙަބީބު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
