އައްޑޫ މީދޫ ދާއިރާގެ މެމްބަރު ރޮޒައިނާ އާދަމް، މަޖިލީހުގެ މެންބަރު ކަމުގެ މަގާމަށް ގެނައުމަކީ ކުރެއްވުނު "ވިޔާނުދާ" ކަމެއް ކަމަށް ޑިމޮކްރެޓްސް ޕާޓީއާއި ދާދިފަހުން ގުޅިވަޑައިގެންނެވި މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ޑިމޮކްރެޓްސްގެ ރިޔާސީ ކެންޑިޑޭޓް އަދި ހުޅުދޫ ދާއިރާގެ މެމްބަރު އިލްޔާސް ލަބީބާ އެކު އައްޑުއަށް ކުރައްވަމުން ގެންދަވާ ދަތުރުފުޅުގައި، މިއަދު ހެނދުނު މަރަދޫ ޖަގަހައިގައި ބޭއްވި ބައްދަލުވުމެއްގައި ބައިވެރިއަކު ކުރި ސުވާލަކަށް ޖަވާބުދެއްވަމުން ނަޝީދު ވިދާޅުވީ، ޕާޓީއަށް ގިނަ މީހުން ވަނުމުން ގިނަ ބައެއްގެ މަޝްވަރާއާ އެކީގައި ރަނގަޅު ކަންތައްތައް ފެންނަ ކަމަށެވެ. 

ނަޝީދު އިތުރަށް ވިދާޅުވީ ރޮޒައިނާ އާއި ޑީއާރުޕީގައި ކުރިން އުޅުއްވި ބޭފުޅުން އެންމެ ފުރަތަަމަ ކުރެއްވި ކަމަކީކުރީގެ ރައީސް މައުމޫން އަބްދުލްގައްޔޫމްއާ ދުރަށް ޖެހިވަޑައިގެން، ޑީއާރުޕީ ބައިބައިކުރުމުގެ މަސައްކަތް ކަމަށެވެ.

ނަޝީދު އިތުރަށް ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވާނެ ވާހަކަތަކާއި، ބަސްތަކާއި، ކެންޕެއިނަށް ދައްކަވާނެ ވާހަތައްވެސް ކަނޑައަޅުއްވަން ތިއްބެވީ ރޮޒައިނާގެ ފިރިކަލުން، ކިނބިދޫ ދާއިރާގެ މެމްބަރު މުހައްމަދު ނާޝިޒް ފަދަ ބޭފުޅުން ކަމަށެވެ. އަދި މިހާރު ރައީސުލްޖުމްހޫރިއްޔާއެއް 'ނެތް' ކަމަށްވެސް ނަޝީދު ވިދާޅުވި އެވެ. 

"މިއަދު ރޮޒައިނާގެ ފިރިކަލުން، ނާޝިޒް އެހުންނަވަނީ ރައީސުލްޖުމްހޫރިއްޔާގެ ކެމްޕޭން އޭޖެންޓަކަށް. މިއަދު ރައީސުލްޖުމްހޫރިއްޔާގެ މެސެޖިން، ރައީސުލްޖުމްހޫރިއްޔާ ކެމްޕޭނުގައި ދައްކާނެ ވާހަކަ، ވިދާޅުވާނެ ބަސްތައް، ވިދާޅުވާން އެ ތިއްބެވީ މި ބޭބޭފުޅުން. އެ ބޭފުޅުން އެ ތިއްބެވީ ރައީސުލްޖުމްހޫރިއްޔާ ވަށާލައްވާފަައި، ރައީސުލްޖުމްހޫރިއްޔާއެއް ނުއެއް ނެތް. އަޅުގަނޑުމެންގެ ހުރި އެއްޗަކީ އަންނަން އޮތް ރައީސުލްޖުމްހޫރިއްޔާ، އޮނަރަބަލް އިލްޔާސް ލަބީބް." ނަޝީދު ވިދާޅުވިއެވެ.