އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް އޭގައި ނޯވޭއާއި ފިލިޕީންސް ވާދަކުރި މެޗު ފަސޭހަކަމާއި އެކު 6-0 ގެ ނަތީޖާއަކުން ފިލިޕީންސް އިން ކާމިޔާބުކޮށްފި އެވެ.

މި މެޗުގެ ފުރަތަަމަ ހާފުގައި ނޯވޭ އިން ތިން ލަނޑުގެ ލީޑެއް ހޯދިއިރު، މެޗުގެ ވަރަށް ކުރީކޮޅު އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މި ލަނޑު ފުރަތަމަ ހާފު ފެށިގެން ހަވަނަ މިނެޓުގައި ކާމިޔާބުކޮށްދިނީ ރޯމާގެ މިޑްފީލްޑަރު ސޯފީ ރޯމަން ހައުގް އެވެ. މިއީ އެޓީމުގެ މިޑްފިލްޑަރު ތިއާ ބްޖެލްޑް ގޯލު ކުރިމައްޗަށް ހުރަސްކޮށްދިން ބޯޅައެއް އެއްފަހަރުން ޖަހައި ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

ނޯވޭ އިން މި މެޗުގައި ކާމިޔާބުކުރި ދެވަނަ ލަނޑު ވެސް ކާމިޔާބުކޮށްދިން ސޯފީ ރޯމަން ހައުގް އެވެ. މިއީ ފުރަތަމަ ހާފުގެ 17 ވަނަ މިނެޓުގައި އެޓީމުގެ މެންޗެސްޓާ ޔުނައިޓެޑްގެ މިޑްފީލްޑަރު ވިލްޑޭ ބޯ ރާއިސާ ފިލިޕީންސްގެ ޕެނަލްޓީ އޭރިއާ ތެރެއަށް ހުރަސްކޮދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

Advertisement

މި މެޗުގައި ނޯވޭ އިން ކާމިޔާބުކުރި ތިންވަނަ ލަނޑު ފުރަތަމަ ހާފުގެ 31 ވަނަ މިނެޓުގައި ކާމިޔާބުކޮށްދިނީ އެޓީމުގެ ބާސެލޯނާ ފޯވާޑް ކެރޮލައިން ހޭންސެން އެވެ. މިއީ ފިލިޕީންސްގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން ނޯވޭ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ނޯވޭ އިން އިތުރު ތިން ލަނޑު ކާމިޔާބުކުރިއިރު، އެޓީމުގެ ހަތަރުވަނަ ލަނޑަކީ ދެވަނަ ހާފު ފެށިގެން ތިންވަނަ މިނެޓުގައި ފިލިޕީންސްގެ ޑިފެންޑަރު އެލިސިއާ ބާކާ އަތުން ބައިކޮޅަށް ވަން ލަނޑެކެވެ. އަދި ނޯވޭގެ ފަސްވަނަ ލަނޑު ދެވަނަ ހާފުގެ 53 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ މިޑްފީލްޑަރު ގުރޯ ރެއިޓެން އެވެ.

މި މެޗުގައި ފިލިޕީންސް އަށް އިތުރު މައްސަލަތަކެއް ދިމާވީ ފަހުހާފުގެ 67 ވަނަ މިނެޓުގައި އެޓީމުގެ ޑިފެންޑަރު ސޯފިއާ ހެރިސަން ކުރި ނުރައްކާތެރި ފައުލަކާ ގުޅިގެން ރެފްރީ އޭނާއަށް ސީދާ ރަތް ކާޑެއް ދައްކާ ދަނޑުން ފޮނުވާލުމުންނެވެ.

މި މެޗުގައި ނޯވޭގެ ހަވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދީ، ސޯފީ ރޯމަން ހައުގް ވަނީ މި މެޗުގައި އޭނާގެ ހެޓްރިކް ފުރިހަމަކޮށްފައެވެ. މިއީ އެޓީމުގެ ޗެލްސީ މިޑްފީލްޑަރު ގުރޯ ރެއިޓެން ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މިލަނޑާއެކު މެޗުގެ ކުޅުން ނިމިގެންދިޔައީ 6-0 ގެ ނަތީޖާއަކުން ނޯވޭ ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ކުޅުނު ތިން މެޗުން ހަތަރު ޕޮއިންޓް ހަމަކޮށް ގުރޫޕްގެ ދެވަނަ ޓީމުގެ ގޮތުގައި ނޯވޭ މުބާރާތުގެ ދެވަަނަ ބުރުގެ ޖާގަ ހޯދިއިރު، މި މެޗުން ބަލިވި ފިލިޕީންސް ކުޅުން ތިން މެޗުން ލިބުނު ތިން ޕޮއިންޓާއެކު ވަނީ މުބާރާތުން ކަޓާފައެވެ.