އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް އޭގައި މިއަދު މެންދުރު ކުޅެވުނު ދެވަނަ މެޗުގައި ސްވިޒަލޭންޑާއި އެއްވަރުވެ، ނިއުޒިލޭންޑް ހިތްދަތި ގޮތަކަށް މުބާރަތުން ކަޓައިފިއެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މެޗު ޑޮމިނޭޓުކުރީ އަމިއްލަ ސަޕޯޓަރުންގެ ކުރިމަތީގައި ކުޅެމުންދިޔަ ނިއުޒިލޭންޑުން ނެވެ. އެގޮތް މިހާފުގައި އެޓީމުން އެންމެ ހުސް ފުރުސަތެއް ލިބުނީ ފޯވާޑް ޖެކީ ހޭންޑް އަށެވެ. ފުރަތަަމަ ހާފުގެ 23 ވަނަ މިނެޓުގައި ސްވިޒަލޭންޑްގެ ޕެނަލްޓީ އޭރިއާ ތެެރެއިން ލިބުނު ހުސް ފުރުސަތުގައި އޭނާ ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ.

މިއާއެކު ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

Advertisement

މެޗުގެ ދެވަަނަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔަ އިރު، މިހާފުގައި ވެސް ރަގަޅު ހަމަލާތަކެއް ތަނަވަސްކުރީ ނިއުޒިލޭންޑުން ނެވެ. އެގޮތުން މިހާފުގައި އެޓީމުން ފޮނުވާލި ހަތަރު ހަމަލާގެ ތެރެއިިން ދެ ހަމަލާއެއް ސްވިޒަލޭންޑްގެ ގޯލާއި އަމާޒުވިއިރު، މިހާފުގައި އެޓީމުން އެންމެ ހުސް ފުރުސަތެއް ލިބުނީ އެޓީމުގެ ގޯލްކީޕަރު ވިކްޓޯރިއާ އެސަން އަށެވެ.

ދެވަނަ ހާފުގެ އިތުރު ވަގުތުގެ ތެރޭގައި ސްވިޒަލޭންޑްގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުމެއްގައި އެޓީމުގެ ކުޅުންތެރިއަކު ގޯލު ކުރިމައްޗަށް ހުރަސްކޮށްދިން ބޯޅައެއް މުޅިން ހުސްކޮށް ހުރެ ވިކްޓޯރިއާ ބޮލުން ކުރިއަށް ފޮނުވާލި ބޯޅަ ދިޔައީ ގޯލާއި އަމާޒުނުވެ ދަނޑިކައިރިން ބޭރަށެވެ.

މިއާއެކު މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މި މެޗުން ލިބުނު އެއް ޕޮއިންޓާއެކު ކުޅުނު ތިން މެޗުން ސްވިޒަލޭންޑަށް ފަސް ޕޮއިންޓް ލިބިފައިވާއިރު، އެޓީމު ދެވަނަ ބުރުގެ ފުރުސަތު ހޯދީ ގުރޫޕްގެ އެއްވަނަ ޓީމުގެ ގޮތުގައެވެ. މި ގުރޫޕުން ދެވަނަ ލިބުނީ ހަތަރުވަނަ ޕޮއިންޓާއެކު ފައިދާ ގޯލުގެ ތަފާތުން ނޯވޭ އަށެވެ. 

މުބާރާތުގައި ކުޅުނު ތިން މެޗުން ނިއުޒިލޭންޑަށް ވެސް ހަތަރު ޕޮއިންޓް ލިބުނު ނަމަވެސް، އެޓީމު މުބާރާތުން ކެޓީ ގުރޫޕްގެ ތިންވަނަ ޓީމުގެ ގޮތުގައެވެ. މި ގުރޫޕްގެ ފުލަށް ދިޔައީ ފިލިޕީންސް އެވެ.