ދިވެހި ޕްރެމިއާ ލީގުގައި މިރޭ ބުރު ސްޕޯޓްސް ކްލަބާއި ޔުނައިޓެޑް ވިކްޓަރީ ވަދަކުރި މެޗުގެ ފަހުވަގުތު ކާމިޔާބުކުރި ލަނޑުތަކާއެކު 3-1 ގެ ނަތީޖާއަކުން ބުރު ސްޕޯޓްސް ކްލަބް ކާމިޔާބުކޮށްފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މި މެޗުގައި ފުރަތަަމަ ލަނޑުޖަހައި ކުރިހޯދީ ބުރު ސްޕޯޓްސް ކްލަބުން ނެވެ. މި ލަނޑު ފުރަތަމަ ހާފުގެ 30 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ މުހައްމަދު ނާއިމް އެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ބުރު ސްޕޯޓްސް ކްލަބް ކުރީގައި އޮވެގެންނެވެ.

Advertisement

މެޗުގެ ދެވަަނަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މި މެޗުގައި ބުރުން ކާމިޔާބުކުރި ދެވަނަ ލަނޑު ފަހުހާފުގެ 76 ވަނަ މިނެޓުގައި ކާމިޔާބުކޮށްދިނީ އަލީ ހަމްދާން އެވެ.

ބުރުން ދެލަނޑުގެ ލީޑެއް ނަގައިފައި ވަނިކޮށް ޔުނައިޓެޑް ވިކްޓަރީ އަށް ނަތީޖާގެ ފަރަގު ކުޑަކޮށްދިނީ ފަހުހާފުގެ 83 ވަނަ މިނެޓުގައި އެޓީމުގެ ފޯވާޑް ޝަނާން ރަޝީދު އެވެ. ނަމަވެސް މެޗުގެ އިތުރު ވަގުތުގެ ތެރޭގައި ބުރުން ވަނީ އިތުރު ލަނޑެއް ކާމިޔާބުކޮށް ނަތީޖާ 3-1 އަށް ބަދަލުކޮށްފައެވެ.

މިލަނޑު އެޓީމަށް ކާމިޔާބުކޮށްދިނީ މުހައްމަދު އަންވަރު އެވެ. މިލަނޑާއެކު މެޗުގެ ކުޅުން ނިމިގެންދިޔައީ 3-1 ގެ ނަތީޖާއަކުން ބުރު ސްޕޯޓްސް ކްލަބް ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ބުރު ސްޕޯޓްސް ކްލަބަށް ކުޅުނު ހަ މެޗުން 12 ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގު ތާވަލްގެ ހަތަރުވަނައިގައެވެ. ތިން ވަނައިގައި އޮތް ސްޕަރ ޔުނައިޓެޑް ސްޕޯޓްސް އަށް ވެސް ހަ މެޗުން 12 ޕޮއިންޓް ލިބިފައިވާއިރު، މިދެޓީމަށް ވެސް އޮތީ ފައިދާ ހަތަރު ލަނޑެވެ. މިއާއެކު ސްޕަރ ޔުނައިޓެޑް ސްޕޯޓްސް އަށް ތިންވަނަ ލިބެނީ ޖެހި ގޯލުގެ ތަފާތުންނެވެ.

މި މެޗުން ބަލިވި ޔުނައިޓް ވިކްޓަރީ ކުޅުނު ހަ މެޗުން ލިބުނު ތިން ޕޮއިންޓާއެކު އެޓީމު މިވަގުތު އޮތީ ލީގު ތާވަލުގެ 6 ވަނައިގައެވެ.