ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަކީ ފަރުޟު ފަސް ނަމާދުގެ އިތުރުން ދަމު ނަމާދު ވެސް ކުރައްވާ ބޭފުޅެއް ކަމަށް މީދޫ ދާއިރާގެ މެންބަރު އަދި އެމްޑީއޭގެ ލީޑަރު އަހުމަދު ސިޔާމް (ސަން ސިޔާމް) ވިދާޅުވެއްޖެއެވެ. 

ރައީސް ޞާލިހުގެ ރިޔާސީ ކެމްޕެއިނަށް ށ. އަތޮޅަށް ކުރައްވަމުންދާ ދަތުރުފުޅުގައި އެ އަތޮޅު ފޮނަދޫ ގައި ބޭއްވި ބައްދަލުވުމުގައި ވާހަކަ ދައްކަވަމުން ސިޔާމް ވިދާޅުވީ، ރައީސް ޞާލިހު އާއި އެކު 20 އަހަރު ވަންދެން ރައްޔިތުންގެ މަޖިލީހުގައި މަސައްކަތް ކުރައްވާފައިވާ ކަމަށެވެ. އަދި އެވީހާ ދުވަހުވެސް އެމަނިކުފާނު ކޯފާވެވަޑައިގެން އިންނެވި ތަން ނުފެންނަ ކަމަށް ސިޔާމް ވިދާޅުވި އެވެ. 

ސިޔާމް އިތުރަށް ވިދާޅުވީ އެމްޑީޕީގެ ތެރޭގައި ތިބި "ލާދީނީ ތައްގަނޑު" ޖަހާފައި ތިބި މީހުންތައް އެ ޕާޓީން މިހާރު ގޮސްފައިވާ ކަމަށެވެ. އަދި އެމްޑީޕީގެ ތެރޭގައި ލާދީނީ މީހެއް ނެތް ކަމީ ދިވެހި ރައްޔިތުންވެސް އުފާ ކުރަންޖެހޭ ކަމެއް ކަމަށް ސިޔާމް ވިދާޅުވި އެވެ. 

މިއާއެކު ސިޔާމް ވިދާޅުވީ، ރައީސް ޞާލިހު އަކީ ދީނަށް ޖޯކު ޖަހައި، ދީނާއި ޚިލާފް ވާހަކަ ދައްކަވާ ބޭފުޅެއް ނޫން ކަމަށެވެ. 

ސިޔާމް ވިދާޅުވީ، މީހުން ދެކެ ބިރުގަނެ، މީހުންނަށް އަޅާލާނީ ރައީސް ޞާލިހު ފަދަ މާތް الله ދެ ބިރު ގަންނަ ބޭފުޅެއް ކަމަށެވެ. އަދި ދީނަށް ހަޖޫ ޖަހާ ބޭފުޅެއް މީހުން ދެކެ ބިރު ވެސް ނުގަންނާނެ ކަމަށާ، އަދި މީހުންނަށް އޯގާތެރިވެސް ނުވާނެ ކަމަށް އޭނާ ވިދާޅުވި އެވެ.