އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް ސީގައި މިއަދު މެންދުރު ޒެމްބިއާ އާއި ކޮސްޓަރިކާ ވާދަކުރި މެޗު 3-1 ގެ ނަތީޖާއަކުން ޒެމްބިއާ ކާމިޔާބުކޮށްފިއެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ، ވަރަށް ކުރީކޮޅު ޒެމްްބިއާ އިން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މި ލަނޑު މެޗު ފެށިގެން ތިންވަނަ މިނެޓުގައި ކާމިޔާބުކޮށްދިނީ އެޓީމުގެ ޑިފެންޑަރު ލަޝޯމޯ މްވީމްބާ އެވެ. މިއީ އެޓީމުގެ ފޯވާޑް އަވެލް ޗިތުންޑޫ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ .

ފުރަތަަމަ ހާފުގެ 31 ވަނަ މިނެޓުގައި ޒެމްބިއާގެ ލީޑު ފުޅާކޮށްދިނީ ފޯވާޑް ބަރްބްރާ ބަނޑާ އެވެ. މިއީ އެެޓީމަށް ލިބުނު ޕެނަލްޓީއަކުން އޭނާ ކާމިޔާބުކޮށްދިން ލަނޑެކެވެ. 

ފުރަތަަމަ ހާފުގައި ކޮސްޓަރީކާ އިން ގިނަވަގުތު ބޯޅަ ހިފަހައްޓައިގެން ކުޅުނު ނަމަވެސް މިހާފުގައި ރަގަޅު ހަމަލާތަކެއް ފެނިގެންދިޔައީ ޒެމްބިއާގެ ފަރާތުންނެވެ. މިއާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ޒެމްބިއާ ކުރީގައި އޮވެގެންނެވެ.

މެޗުގެ ދެވަަނަ ހާފު ވަރުގަދަކޮށް ފެށީ ކޮސްޓަރީކާ އިންނެވެ. އެގޮތުން މިހާފު ފެށިގެން ދެވަނަ މިނެޓުގައި އެޓީމުން ލަނޑެއް ކާމިޔާބުކޮށް ނަތީޖާގެ ފަރަގު ކުޑަކުރި އެވެ. މިލަނޑު އެޓީމަށް ކާމިޔާބުކޮށްދިނީ ފޯވާޑް މެލިސާ ހެރޭރާ އެވެ. މިއީ އެޓީމުގެ ވެލެރިއާ ޑެލް ކެމްޕޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި މިއީ މި މުބާރާތުގައި އެޓީމުން ކާމިޔާބުކުރި ފުރަތަމަ ލަނޑު ވެސް މެއެވެ.

މެޗުގެ އިތުރު ވަގުތުގެ ތެރޭގައި ޒެމްބިއާގެ ތިންވަނަ ލަނޑު ކާމިޔާބުކޮށްދިނީ ރޭޗަލް ކުންޑަނަންޖީ އެވެ. މިއީ ބަރްބްރާ ބަނޑާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މި ލަނޑާއެކު މެޗުގެ ކުޅުން ނިމިގެންދިޔައީ 3-1 ގެ ނަތީޖާއަކުން ޒެމްބިއާ ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ޒެމްބިއާ މުބާރާތް ނިންމާލި ގުރޫޕް ސީގެ ތިންވަނަގައެވެ. އަދި މި މެޗުން ބަލިވި ކޮސްޓަރީކާ މުބާރާތް ނިންމާލި ކުޅުނު ތިން މެޗުން ވެސް ބަލިވެ ގްރޫޕް ސީގެ ހަތަރުވަނައިގައެވެ.